முதல்-அமைச்சர் விஜய்யின் உத்தரவைத் தொடர்ந்து, தமிழகத்தில் ரவுடிகள் மற்றும் போதைப்பொருள் குற்றவாளிகளுக்கு எதிராக போலீசார் தீவிர நடவடிக்கை எடுத்து வருகின்றனர். இதன் விளைவாக, கடந்த மூன்று நாட்களில் மட்டும் 844 ரவுடிகளும், 419 போதைப்பொருள் குற்றவாளிகளும் கைது செய்யப்பட்டுள்ளனர். இது பொதுமக்கள் மத்தியில் பெரும் வரவேற்பைப் பெற்றுள்ளது.
தமிழக போலீஸ் டி.ஜி.பி. அலுவலகம் வெளியிட்டுள்ள செய்திக்குறிப்பின்படி, மாநிலத்தின் அமைதி மற்றும் பாதுகாப்பை உறுதி செய்வதற்காக இந்த நடவடிக்கைகள் மேற்கொள்ளப்பட்டுள்ளன. முதல்-அமைச்சரின் ஆணைக்கிணங்க, சமூகத்திலிருந்து ரவுடிகளையும், போதைப்பொருள் பயன்பாட்டையும் முற்றிலுமாக ஒழிக்கும் பணியில் காவல்துறை உறுதியாக உள்ளது.
கடந்த மூன்று நாட்களில், 15,349 ரவுடிகள் அடையாளம் காணப்பட்டு சோதனைகள் நடத்தப்பட்டன. இதில், 844 ரவுடிகள் கைது செய்யப்பட்டு நீதிமன்ற காவலில் சிறையில் அடைக்கப்பட்டனர். இவர்களில் 488 பேர் வரலாற்றுப் பதிவேட்டில் உள்ள ரவுடிகள், 356 பேர் வரலாற்றுப் பதிவுறா ரவுடிகள் ஆவர். மேலும், போதைப் பொருட்கள் தொடர்பான 294 வழக்குகள் பதிவு செய்யப்பட்டு, 419 குற்றவாளிகள் கைது செய்யப்பட்டுள்ளனர். சந்தையில் ரூ.1 கோடியே 42 லட்சத்து 78 ஆயிரம் மதிப்பிலான 267 கிலோ கஞ்சா மற்றும் 2,476 போதை மாத்திரைகளும் கைப்பற்றப்பட்டுள்ளன.
ரவுடிகள் மற்றும் போதைப்பொருள் குற்றவாளிகளின் நடவடிக்கைகளைக் கண்காணித்தல், அவர்களின் குழு செயல்பாடுகளை முடக்குதல், குற்றச் செயல்களைக் கட்டுக்குள் கொண்டு வருதல் போன்ற தொடர் நடவடிக்கைகள் தமிழ்நாடு காவல்துறையின் முக்கிய பணியாகும். பொது அமைதியையும், பாதுகாப்பான சூழலையும் உறுதி செய்வதில் காவல்துறை உறுதியாக உள்ளது.
