தமிழகத்தில் அடுத்த சில நாட்களுக்கு கனமழை பெய்ய வாய்ப்புள்ளது. குறிப்பாக விழுப்புரம், கடலூர், மயிலாடுதுறை, தேனி ஆகிய மாவட்டங்களில் இடியுடன் கூடிய கனமழை வெளுத்து வாங்கும் என சென்னை வானிலை ஆய்வு மையம் எச்சரிக்கை விடுத்துள்ளது. மே 16-ம் தேதி இந்த மாவட்டங்களில் கனமழை பெய்யும் என எதிர்பார்க்கப்படுகிறது.

கடந்த 24 மணி நேரத்தில், தமிழகத்தின் சில பகுதிகளில் லேசான மழை பதிவாகியுள்ளது. புதுச்சேரி மற்றும் காரைக்கால் பகுதிகளிலும் அவ்வப்போது மழை பெய்துள்ளது. மணமேல்குடியில் 3 செ.மீ., தூத்துக்குடியில் 2 செ.மீ. மழை பதிவாகியுள்ளது. இருப்பினும், தற்போது ஆழ்ந்த காற்றழுத்தத் தாழ்வுப்பகுதி வங்கக்கடலில் நீடிப்பதால், மழைக்கான வாய்ப்புகள் அதிகரித்துள்ளன.

மே 17-ம் தேதி நிலவரப்படி, திண்டுக்கல், தேனி, கோவை, நீலகிரி மாவட்டங்களில் ஓரிரு இடங்களில் கனமழை பெய்யக்கூடும். சென்னை மற்றும் புறநகர் பகுதிகளிலும் மே 15 மற்றும் 16 ஆகிய தேதிகளில் வானம் மேகமூட்டத்துடன் காணப்படும் என்றும், நகரின் சில பகுதிகளில் மிதமான மழைக்கு வாய்ப்புள்ளது என்றும் வானிலை மையம் தெரிவித்துள்ளது.

மீனவர்களுக்கு முக்கிய எச்சரிக்கை விடுக்கப்பட்டுள்ளது. மே 19-ம் தேதி வரை தமிழக கடலோரப் பகுதிகள், மன்னார் வளைகுடா, குமரிக்கடல் பகுதிகள், அந்தமான் கடல், தெற்கு வங்கக்கடல், மத்திய கிழக்கு வங்கக்கடல் மற்றும் கேரளம் – கர்நாடகா கடலோரப் பகுதிகள், லட்சத்தீவு பகுதிகளில் பலத்த சூறாவளிக் காற்று வீசக்கூடும். எனவே, இந்த தேதிகளில் இந்தப் பகுதிகளுக்கு மீனவர்கள் யாரும் செல்ல வேண்டாம் என அறிவுறுத்தப்பட்டுள்ளது.

Author

Admin