சில சமயங்களில் எந்தவிதமான காரணமும் இன்றி திடீரென உடல் எடை அதிகரிப்பது போல் தோன்றும். இதற்குப் பல அறிவியல் பூர்வமான காரணங்கள் உள்ளன. இந்த திடீர் எடை அதிகரிப்புக்கான முக்கிய காரணங்களை இந்தப் பதிவில் விரிவாகக் காண்போம்.
முந்தைய நாள் இரவு அளவுக்கு அதிகமாக மது அருந்துவது அல்லது போதுமான அளவு தண்ணீர் அருந்தாமல் இருப்பது போன்ற பழக்கவழக்கங்கள் மறுநாள் உடல் எடையில் மாற்றத்தை ஏற்படுத்தும். போதுமான அளவு தண்ணீர் அருந்தாவிட்டாலும், மது அருந்தினாலும் நம் உடல் நீரை வெளியேற்றாமல் தேக்கி வைத்துக் கொள்ளும். இதனால் உடலில் நீர் சேர்வதால் உடல் எடை அதிகரித்து காணப்படுகிறது.
மேலும், போதுமான நேரம் உறங்காமல் இருப்பது அல்லது ஆழ்ந்த உறக்கம் இல்லாததும் உடல் எடை திடீரென அதிகரிக்க முக்கிய காரணங்களாக அமைகின்றன. குறைந்த நேரம் உறங்கும்போது, மறுநாள் அதிகமாக உணவு உண்ண நேரிடும். வழக்கத்திற்கு மாறாக அதிக அளவு சாப்பிடும்போது, உடலின் இயற்கையான ஒத்திசைவு செயல்பாடு பாதிக்கப்படுகிறது.
முந்தைய நாள் ஏதேனும் உணர்ச்சிரீதியான அழுத்தத்திற்கு ஆளாகியிருந்தாலும், மறுநாள் உடல் எடை அதிகரிக்க வாய்ப்புள்ளது. மன அழுத்தம் அதிகமாகும் போது, உடலில் கொழுப்பைச் சேர்க்கும் 'கார்டிசோல்' என்ற ஹார்மோனின் உற்பத்தி அதிகரிக்கிறது. இதன் காரணமாக உடலில் கொழுப்பு படிந்து, உடல் எடை திடீரென உயர்ந்து காணப்படுகிறது.
எனவே, மது அருந்துதல், போதிய நீர் அருந்தாமை, தூக்கமின்மை, அதிகப்படியான உணவு, மன அழுத்தம் போன்ற பல்வேறு காரணங்களால் உடல் எடை திடீரென அதிகரிக்கக்கூடும். இவற்றைக் கட்டுப்படுத்துவதன் மூலம் உடல் எடையைச் சீராக வைத்திருக்க முடியும்.
