தமிழகத்தில் வரலாறு காணாத வகையில் பெட்ரோல், டீசல், சமையல் எரிவாயு சிலிண்டர் மற்றும் சிஎன்ஜி விலைகள் கடுமையாக உயர்த்தப்பட்டுள்ளதால், பொதுமக்கள் பெரும் அதிர்ச்சி அடைந்துள்ளனர். இந்த விலை உயர்வை உடனடியாகத் திரும்பப் பெற வேண்டும் என தேமுதிக பொதுச் செயலாளர் பிரேமலதா விஜயகாந்த் வலியுறுத்தியுள்ளார்.
தொடர்ந்து விண்ணை முட்டும் அளவிற்கு உயர்ந்து வரும் இந்த எரிபொருள் விலைகள், சாமானிய மக்களின் அன்றாட வாழ்வாதாரத்தை நேரடியாகப் பாதிப்பதாகவும், இதனால் அத்தியாவசியப் பொருட்களின் விலையும் உயர்ந்து, இரட்டைச் சுமையாக மக்களை வாட்டி வதைப்பதாகவும் அவர் தனது அறிக்கையில் குறிப்பிட்டுள்ளார். ஒருபுறம் கட்டுக்கடங்காத விலை உயர்வு, மறுபுறம் பெட்ரோல், டீசல், சமையல் கேஸ் சிலிண்டர்களுக்கு நிலவும் தட்டுப்பாடு ஆகியவை மக்களிடையே பெரும் அச்சத்தையும், அச்சமூட்டும் சூழலையும் உருவாக்கியுள்ளன.
இந்த நிலை நீடித்தால், மக்களின் இயல்பு வாழ்க்கை முற்றிலுமாக முடங்கி, மீண்டும் ஒரு 'லாக்டவுன்' போன்ற அவசர நிலையை உருவாக்குமோ என்ற அச்சமும் மக்களிடையே பரவலாக எழுந்துள்ளது. விலைவாசி உயர்வு மற்றும் தட்டுப்பாடு ஆகிய இரட்டைச் சுமைகளால் பொதுமக்கள் எதிர்காலம் குறித்த கவலையில் தவிக்கின்றனர். இது குறித்து தமிழக அரசும், மத்திய அரசும் உடனடியாகத் தலையிட்டு உரிய நடவடிக்கை எடுக்க வேண்டும்.
எனவே, உயர்த்தப்பட்ட பெட்ரோல், டீசல், சிஎன்ஜி மற்றும் சமையல் எரிவாயு சிலிண்டர் விலையை உடனடியாகத் திரும்பப் பெற வேண்டும் என்றும், சந்தையில் நிலவி வரும் எரிபொருள் தட்டுப்பாட்டைப் போக்க அவசர நடவடிக்கை எடுக்க வேண்டும் என்றும் பிரேமலதா கோரிக்கை விடுத்துள்ளார். பொதுமக்களின் பொருளாதாரச் சுமையைக் குறைத்து, அவர்களின் வாழ்வாதாரத்தைப் பாதுகாக்கும் தீர்வுகளை மத்திய, மாநில அரசுகள் விரைந்து செயல்படுத்த வேண்டும் என்றும் அவர் வலியுறுத்தியுள்ளார்.
