கோவை சூலூரில் 10 வயது சிறுமி பாலியல் வன்கொடுமை செய்யப்பட்டு கொடூரமாக கொலை செய்யப்பட்ட சம்பவம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. இந்த துயரச் சம்பவம் குறித்து நடிகர் எம்.எஸ்.பாஸ்கர் தனது ஆழ்ந்த வருத்தத்தையும், கண்டனத்தையும் தெரிவித்துள்ளார்.
சம்பவம் நடந்து 24 மணி நேரத்திற்குள் குற்றவாளியை கைது செய்த காவல் துறையினரை நடிகர் எம்.எஸ்.பாஸ்கர் மனதாரப் பாராட்டியுள்ளார். இருப்பினும், குற்றவாளி தனது குற்றத்தை ஒப்புக்கொண்ட பிறகு, தொலைக்காட்சி விவாதங்கள் எதற்கு என்றும், உடனடியாக குற்றவாளிகளை களையெடுக்க வேண்டும் என்றும் அவர் வலியுறுத்தியுள்ளார். அப்போதுதான் மற்றவர்களுக்கு அச்சம் ஏற்படும் என்றும் அவர் குறிப்பிட்டுள்ளார்.
இதுபோன்ற குற்றவாளிகள் சமூகத்திற்கு தேவையா என கேள்வி எழுப்பிய எம்.எஸ்.பாஸ்கர், இதே குற்றவாளி ஏற்கனவே அண்ணா பல்கலைக்கழக மாணவி விவகாரத்தில் சிறைத் தண்டனை அனுபவித்து வருவதாகவும், அப்போது அவனுக்கு சாகும் வரை சிறை தண்டனை விதிக்கப்பட்டதாகவும் சுட்டிக்காட்டியுள்ளார். கள்ள உறவுக்காக குழந்தைகளைக் கொன்றவர்களும், அவர்களுக்கு உதவியவர்களும் சமூகத்திற்கு ஆபத்தானவர்கள் என்றும் அவர் தெரிவித்துள்ளார்.
மேலும், குற்றவாளிகளுக்கு உதவ இன்னொருவர் அரசாங்கத்தின் உதவியை நாடுவதை ஏற்க முடியாது என்றும், இத்தகைய குற்றவாளிகள் வாழ்வதற்குத் தகுதியற்றவர்கள் என்பதே தனது கருத்து என்றும் எம்.எஸ்.பாஸ்கர் ஆணித்தரமாக கூறியுள்ளார். உயிரிழந்த சிறுமியின் குடும்பத்தினருக்கு தனது ஆழ்ந்த இரங்கலையும் அவர் தெரிவித்துள்ளார்.
