காலையில் பசி எடுக்காமல் இருப்பது பலருக்கும் ஒரு பொதுவான பிரச்சனையாக உள்ளது. இதற்கான காரணங்கள் குறித்து பி.எஸ்.ஆர்.ஐ மருத்துவமனையின் நீரிழிவு மற்றும் எண்டோகிரைனாலஜி மூத்த ஆலோசகர் டாக்டர் ஹிமிகா சாவ்லா விரிவாக விளக்கியுள்ளார். உடலின் வளர்சிதை மாற்றம், ஹார்மோன் மாற்றங்கள், தூக்கத்தின் தரம், மனஅழுத்தம் மற்றும் உணவுப் பழக்கவழக்கங்கள் ஆகியவை பசியைப் பாதிக்கலாம் என அவர் தெரிவித்துள்ளார்.
காலையில் பசி எடுப்பதை தூக்கம், மனஅழுத்தம், ஹார்மோன் மாற்றங்கள், உணவு சாப்பிடும் நேரம் மற்றும் நபருக்கு நபர் மாறுபடும் வளர்சிதை மாற்ற சுழற்சி உட்பட பல காரணிகள் தீர்மானிக்கின்றன. சிலருக்கு ரத்த சர்க்கரை அளவின் மாறுபாடுகளால் பசியின்மையில் மாற்றம் ஏற்படலாம். இருப்பினும், காலையில் பசி எடுக்காதது மட்டுமே ஒருவருக்கு இன்சுலின் எதிர்ப்பு அல்லது நீரிழிவு நோய் இருப்பதற்கான அறிகுறி என்று கூற முடியாது. ஒரே ஒரு அறிகுறியை மட்டும் தனித்துப் பார்க்காமல், உடலின் ஒட்டுமொத்த நிலையையும் கவனித்து உங்கள் உடல் உங்களுக்கு என்ன சொல்ல வருகிறது என்பதைப் புரிந்துகொள்வது நல்லது.
'உங்களுக்கு காலையில் பசி எடுக்கவில்லை என்பதற்காகவே உங்கள் ரத்த சர்க்கரை அளவு கட்டுப்பாட்டில் இல்லை என்று அர்த்தமல்ல. உடலின் வளர்சிதை மாற்றம், ஹார்மோன் மாற்றங்கள், தூக்கத்தின் தரம், மனஅழுத்தம் மற்றும் உணவுப் பழக்கவழக்கங்கள் ஆகியவை பசியைப் பாதிக்கலாம்' என்று டாக்டர் ஹிமிகா சாவ்லா கூறியுள்ளார். உதாரணமாக, இரவில் அதிக அளவிலான உணவையோ அல்லது தாமதமாக நொறுக்குத் தீனிகளையோ சாப்பிட்டிருந்தால், காலையில் கண் விழிக்கும்போது வயிறு நிறைந்த உணர்வே இருக்கும். சிலரின் பயாலாஜிக்கல் சுழற்சி மற்றும் பசியைக் கட்டுப்படுத்தும் ஹார்மோன்களின் இயல்பு காரணமாகவே காலையில் இயற்கையாகவே பசி குறைவாக இருக்கும்.
சிலருக்கு ரத்த சர்க்கரை அளவில் ஏற்படும் மாறுபாடுகள் பசியைப் பாதிக்கலாம். ஆனால், காலை பசியை மட்டுமே வைத்து ஒருவருக்கு நீரிழிவு நோயோ அல்லது இன்சுலின் எதிர்ப்போ உள்ளதா என்பதை தீர்மானிக்க முடியாது என அவர் மேலும் விளக்கினார். தூங்குவதற்கு முன் அதிக அளவில் சாப்பிடுவது, மறுநாள் காலையில் வயிறு நிறைந்த உணர்வைத் தரும். தொடர்ந்து இரவு நேரத்தில் தாமதமாக சாப்பிடுவது தூக்கத்தின் தரத்தையும் பாதிக்கும். நீண்ட நாட்களாக சீரற்ற நேரத்தில் சாப்பிடுவதும், இரவு நேரத்தில் அதிக கலோரி கொண்ட உணவுகளை உண்பதும் இயல்பான பசி சுழற்சியைப் பாதித்து, வளர்சிதை மாற்ற ஆரோக்கியத்திலும் தாக்கத்தை ஏற்படுத்தும்.
முறையற்ற தூக்கம் பசியைக் கட்டுப்படுத்தும் ஹார்மோன்கள், மனஅழுத்த எதிர்வினைகள் மற்றும் குறிப்பிட்ட உணவுகளின் மீதான ஆசையைப் பாதிக்கும். இருப்பினும், இதன் விளைவுகள் நபருக்கு நபர் மாறுபடும். ஒரே ஒரு நாள் தாமதமாக சாப்பிடுவதோ அல்லது ஒரு நாள் சரியாகத் தூங்காததோ வளர்சிதை மாற்றப் பிரச்சனைக்கு காரணம் ஆகிவிடாது. ஆரோக்கியமான பசி மற்றும் வளர்சிதை மாற்ற பழக்கத்திற்கு சீரான நேரத்தில் உணவருந்துவது, மிதமான இரவு உணவு மற்றும் தினமும் 7 முதல் 9 மணிநேர தூங்குமாறு டாக்டர் சாவ்லா பரிந்துரைக்கிறார்.
பெரும்பாலான மக்களுக்கு காலையில் பசி இல்லாமல் விழிப்பது பெரிய கவலைக்குரிய விஷயம் அல்ல. குறிப்பாக நாள் முழுவதும் சரியான அளவில் சாப்பிட்டு, உடல் எடையை சீராகப் பராமரிப்பவர்களுக்கு இது பிரச்சனையில்லை. இருப்பினும், பசியின்மையில் ஏற்படும் தொடர்ச்சியான மாற்றங்களை, குறிப்பாக சில அறிகுறிகளுடன் சேர்ந்து வரும்போது அலட்சியப்படுத்தக் கூடாது என டாக்டர் சாவ்லா எச்சரிக்கிறார். உணவு அல்லது உடற்பயிற்சியில் எந்த மாற்றமும் செய்யாமல் உடல் எடை குறைந்தால் மருத்துவப் பரிசோதனை அவசியம். தொடர்ச்சியான சோர்வு, அதிக தாகம், அடிக்கடி சிறுநீர் கழித்தல், பார்வையில் மாற்றங்கள், தலைச்சுற்றல், அதிக வேர்வை, நடுக்கம் அல்லது படபடப்பு போன்ற அறிகுறிகள் இருந்தால் மருத்துவரை அணுகுவது நல்லது.
இந்த அறிகுறிகள் நீரிழிவு நோய் அல்லது பிற செரிமானம், ஹார்மோன், வளர்சிதை மாற்றப் பிரச்சனைகளின் பின்னணியாக இருக்கலாம். இந்த அறிகுறிகள் தொடர்ந்தால், அவை ரத்த சர்க்கரை மாறுபாட்டால் தான் ஏற்படுகிறது என நீங்களாகவே யூகிக்காமல் மருத்துவரை அணுகுவது நல்லது. வெறும் வயிற்று ரத்த சர்க்கரை அல்லது ஹெச்.பி.ஏ1.சி (HbA1c) போன்ற பரிசோதனைகள் தேவையா என்பதை மருத்துவர் தீர்மானிப்பார்.
காலையில் பசி இல்லையென்றால் பெரும்பாலான மக்கள் அதிக அளவிலான காலை உணவை கட்டாயப்படுத்திச் சாப்பிட வேண்டியதில்லை. நாள் முழுவதும் தங்களுக்குத் தேவையான ஊட்டச்சத்துக்கள் கிடைக்கும் வரை பசி எடுக்கும் வரை அவர்கள் காத்திருக்கலாம். ஆனால், இன்சுலின் அல்லது ரத்த சர்க்கரையைக் குறைக்கும் குறிப்பிட்ட மருந்துகளை உட்கொள்ளும் நீரிழிவு நோயாளிகள், தங்களது உணவு நேரத்தைப் பற்றி மருத்துவரிடம் ஆலோசிக்க வேண்டும். உணவைத் தள்ளிப்போடுவதோ அல்லது தவிர்க்கவதோ சில மருந்துகளால் ரத்தத்தில் சர்க்கரை அளவு மிகக் குறைவாகும் 'ஹைபோகிளைசீமியா' அபாயத்தை அதிகரிக்கும்.
