தங்கம் விலையில் திடீர் மாற்றம் ஏற்பட்டுள்ளது. ஒரு சவரன் தங்கத்தின் விலை ரூ.1,200 உயர்ந்துள்ளது. இதனால் நகை வாடிக்கையாளர்கள் அதிர்ச்சி அடைந்துள்ளனர். கடந்த மாதம் முழுவதும் தங்கம் விலை கடுமையான சரிவை சந்தித்தது. அமெரிக்கா – ஈரான் இடையேயான போர் பதற்றம் இதற்கு முக்கிய காரணமாக பார்க்கப்பட்டது. இதனால் கச்சா எண்ணெய் விலை உயர்ந்தாலும், தங்கம் விலை குறைய வாய்ப்புள்ளதாக நிபுணர்கள் கணித்திருந்தனர்.

இருப்பினும், கடந்த சில நாட்களாக தங்கம் விலை தொடர்ந்து குறைந்து வந்ததால் நகை வாங்குவோர் மகிழ்ச்சியில் இருந்தனர். நேற்று காலை கணிசமாக குறைந்த விலை, சில மணிநேரங்களில் மீண்டும் அதிகரித்தது. தமிழகத்தில் நேற்று ஒரு சவரன் தங்கம் ரூ.1,06,000க்கு விற்பனையானது.

இந்நிலையில், இன்று தங்கம் விலை சவரனுக்கு ரூ.1,200 உயர்ந்து ரூ.1,07,200க்கு விற்பனை செய்யப்படுகிறது. ஒரு கிராம் தங்கத்தின் விலையும் ரூ.150 உயர்ந்து ரூ.13,400க்கு விற்பனையாகிறது. இந்த திடீர் விலை உயர்வு நகை வாடிக்கையாளர்கள் மத்தியில் பெரும் கவலையை ஏற்படுத்தியுள்ளது.

தங்கம் மட்டுமல்லாமல் வெள்ளி விலையும் உயர்ந்துள்ளது. ஒரு கிராம் வெள்ளி விலை ரூ.5 உயர்ந்து ரூ.250க்கு விற்பனை செய்யப்படுகிறது. ஒரு கிலோ வெள்ளி ரூ.2,50,000க்கு விற்பனை செய்யப்படுகிறது. இந்த விலை ஏற்றம் நடுத்தர மக்களை பெரிதும் பாதித்துள்ளது.