உடற்பயிற்சி செய்பவர்கள் பலர் பச்சை முட்டையை அருந்துவதை வழக்கமாக கொண்டுள்ளனர். ஆனால், இப்படி பச்சை முட்டை குடிப்பது நல்லதா அல்லது கெட்டதா என்பது குறித்த விரிவான தகவல்களை இங்கு காண்போம்.
முட்டையில் மொத்தம் 6.3 கிராம் புரோட்டீன் உள்ளது. மேலும், முட்டையின் வெள்ளை கருவில் குளோரின், மெக்னீஷியம், பொட்டாஷியம், சோடியம், சல்பர், ஜிங்க் உள்ளிட்ட 11 வகையான தாதுக்கள் அடங்கியுள்ளன. மஞ்சள் கருவில் வைட்டமின் டி, பி12, ஏ, இ, கே, பி6 போன்ற சத்துக்களும் காணப்படுகின்றன.
பொதுவாக, அவித்த முட்டையை உட்கொள்ளும்போது, அதன் புரோட்டீனில் 90% வரை உடலுக்குக் கிடைக்கிறது. ஆனால், இதை பச்சையாக சாப்பிட்டால், வெறும் 50% புரோட்டீன் மட்டுமே கிடைக்கும். எனவே, சமைத்து சாப்பிடுவதே சிறந்தது.
முட்டையில் 'சால்மோனெல்லா' என்ற கிருமி உள்ளது. இந்த கிருமி, முட்டையை சமைக்கும்போது இறந்துவிடுகிறது. பச்சையாக முட்டை சாப்பிடும்போது, இந்த கிருமி உடலுக்குள் சென்று வயிற்றுப்போக்கு, வாந்தி போன்ற நோய் தொற்றுகளை ஏற்படுத்தும். குறிப்பாக, கர்ப்பிணி பெண்கள் மற்றும் குழந்தைகள் பச்சை முட்டையை சாப்பிடுவதை முற்றிலுமாக தவிர்க்க வேண்டும்.
