தமிழ்நாடு சுற்றுலாத்துறை ஆணையர் ஜெயசீலன் ஐஏஎஸ், இனி தொல்லியல் துறை இயக்குநர் பொறுப்பையும் கூடுதலாக கவனிப்பார் என்று தமிழக அரசு அறிவித்துள்ளது. இந்த உத்தரவின்படி, தமிழ்நாடு சுற்றுலாத்துறையின் இயக்குநர் பொறுப்பில் இருக்கும் ஜெயசீலன், இனி தொல்லியல் துறையின் இயக்குநர் பொறுப்பையும் கூடுதலாக வகிப்பார். இதற்கு முன்னர், தமிழ்நாடு தொல்லியல் துறையின் இயக்குநர் பொறுப்பை உதயச்சந்திரன் ஐஏஎஸ் கூடுதலாக கவனித்து வந்தார். தற்போது இந்தப் பதவி, தமிழ்நாடு சுற்றுலா வளர்ச்சிக் கழகத்தின் இயக்குநர் ஜெயசீலனிடம் ஒப்படைக்கப்பட்டுள்ளது. குறிப்பாக, தமிழ்நாடு தொல்லியல் துறைக்கு ஒரு புதிய அடையாளத்தை ஏற்படுத்தியவர் உதயச்சந்திரன் ஐஏஎஸ் ஆவார். அவரது இந்த முக்கியப் பதவியை தற்போது அவரிடமிருந்து பறித்துள்ளது தமிழக அரசு. திமுக ஆட்சியில் உதயச்சந்திரன் ஐஏஎஸ் மிகவும் சக்திவாய்ந்த அதிகாரியாக வலம் வந்தார். முதலமைச்சர் மு.க. ஸ்டாலினின் முதன்மைச் செயலாளராக அவர் பணியாற்றியுள்ளார். பின்னர், நிதித்துறை செயலாளராகவும் நியமிக்கப்பட்டார். திமுக ஆட்சியில் முக்கியப் பதவிகளில் உதயச்சந்திரனின் நெருங்கிய நண்பர்கள் மற்றும் நட்பு வளையத்தில் இருந்தவர்கள் மட்டுமே நியமிக்கப்பட்டதாகக் கூறப்படுகிறது. இதனால், திறமையான பல அதிகாரிகள் பாதிக்கப்பட்டதாகவும் தகவல்கள் தெரிவிக்கின்றன.
