சூப்பர் ஸ்டார் ரஜினிகாந்த் நடிக்கும் அவரது 173-வது திரைப்படத்தின் அதிகாரப்பூர்வ தலைப்பு 'தர்மன்' என இன்று காலை அறிவிக்கப்பட்டுள்ளது. கமல்ஹாசன் தயாரிக்கும் இந்தப் படத்தை முதலில் சுந்தர் சி இயக்கவிருந்த நிலையில், பின்னர் அஸ்வத் மாரிமுத்து இயக்குவதாக படக்குழு அதிகாரப்பூர்வமாக அறிவித்துள்ளது.
கடந்த ஆண்டு நவம்பர் 6ம் தேதி இப்படத்தின் அறிவிப்பு வெளியான நிலையில், ஒரு வாரத்திற்குப் பிறகு சுந்தர் சி படத்திலிருந்து விலகுவதாக அறிவித்தார். இதைத் தொடர்ந்து, 'ஓ மை கடவுளே', 'டிராகன்' போன்ற படங்களை இயக்கிய அஸ்வத் மாரிமுத்து இப்படத்தை இயக்குவார் என செய்திகள் பரவின. தற்போது, 'தர்மன்' என்ற அதிரடியான தலைப்புடன் கூடிய போஸ்டரை படக்குழு வெளியிட்டுள்ளது.
பல இயக்குநர்கள் மாற்றங்களுக்குப் பிறகு, அஸ்வத் மாரிமுத்துவின் புதிய திரைக்கதைக்கு ரஜினி பச்சைக்கொடி காட்டியுள்ளார். இப்படத்தில் சூப்பர் ஸ்டார் ரஜினிகாந்த் முதன்முறையாக ஏழைகளுக்கு மிகக் குறைந்த செலவில் மருத்துவ உதவி செய்யும் ஒரு உன்னதமான 'மருத்துவர்' கதாபாத்திரத்தில் நடிக்கவுள்ளதாக நம்பத்தகுந்த வட்டாரங்கள் தெரிவிக்கின்றன.
'தர்மன்' எனப் பெயரிடப்பட்டுள்ள இந்தப் படம், ரஜினியின் திரைப்பயணத்தில் ஒரு முக்கிய மைல்கல்லாக அமையும் என எதிர்பார்க்கப்படுகிறது. புதிய இயக்குநர் அஸ்வத் மாரிமுத்துவின் இயக்கத்தில் ரஜினியின் மருத்துவர் அவதாரம் ரசிகர்களிடையே பெரும் எதிர்பார்ப்பை ஏற்படுத்தியுள்ளது.
