தமிழகத்தில் நிலவும் தொடர் மின்வெட்டு குறித்து முதல்வர் ஜோசப் விஜய் அவர்களை தமிழக பாஜக தலைவர் நயினார் நாகேந்திரன் கடுமையாக விமர்சித்துள்ளார். 'தமிழக மக்களை இருளில் தவிக்கவிட வேண்டாம். தொடர் மின்வெட்டுக்கு என்ன பதில் சொல்லப்போகிறார் முதல்வர் விஜய்?' என அவர் கேள்வி எழுப்பியுள்ளார்.
இது குறித்து அவர் வெளியிட்டுள்ள அறிக்கையில், 'தமிழகத்தில் தொடர்ச்சியாக நடைபெறும் மின்வெட்டால் மக்கள் பெரும் சிரமத்திற்கு ஆளாகியுள்ளனர். மின்வெட்டால் மக்கள் மட்டுமல்லாது, தொழில்களும் கடுமையாக பாதிக்கப்பட்டுள்ளன. தமிழகத்தின் மொத்த மின் தேவையில் வெளிநாட்டு சார்பு 19,126 மெகாவாட் ஆக உள்ளது. மின்வாரியத்தின் மொத்த கடன் ரூ.2.50 லட்சம் கோடி. கடந்த திமுக ஆட்சியில் 4 ஆண்டுகளுக்கான மின் கட்டண உயர்வு மூலம் ரூ.45,000 கோடி வசூலிக்கப்பட்டுள்ளது. மேலும், 5700 மெகாவாட் மின் உற்பத்தி திட்டங்கள் பல ஆண்டுகளாக நிறைவேற்றப்படாமல் தாமதமாகி வருகின்றன.' என குறிப்பிட்டுள்ளார்.
தற்போதைய அனல்மின் திட்டங்களால் மின் நிலையங்களின் உற்பத்தி கால தாமதமாகி வருவதாகவும், இன்னும் இரண்டு ஆண்டுகளுக்குள் 4,000 மெகாவாட் மின் உற்பத்தி தேவைப்படும் நிலையில், அதற்கான திட்டங்கள் என்ன என்பதை த.வெ.க அரசு வெளிப்படையாக அறிவிக்க வேண்டும் என்றும் அவர் வலியுறுத்தியுள்ளார். தமிழகத்தின் மின் சுயசார்பை உறுதி செய்ய முதல்வர் விஜய் என்ன செய்யப்போகிறார்? அவரது நிலைப்பாட்டை சட்டசபையில் வெளிப்படையாக தெரிவிக்க வேண்டும் என்றும் கேட்டுக்கொண்டுள்ளார்.
அதிக விலைக்கு தனியாரிடம் இருந்து மின்சாரம் வாங்குவதால்தான் மின்வாரியத்திற்கு பெரும் நஷ்டம் ஏற்படுவதாகவும், மொத்த மின் உற்பத்தியை அதிகரிக்க மின்சார வாரியம் உரிய நடவடிக்கை எடுக்க வேண்டும் என்றும், இல்லையென்றால் இதே மின்வெட்டு நிலை தொடரும் என்றும் அவர் எச்சரித்துள்ளார். மின்சாரம் என்பது மக்களுக்கு அத்தியாவசிய தேவை என்பதை உணர்ந்து, அது மாநில அரசின் அத்தியாவசிய சேவை என்ற புரிதல் ஆட்சியாளர்களுக்கு இருக்க வேண்டும். 'நான் ஒரு தூயசக்தி. என்னிடம் வாருங்கள். எல்லாம் கிடைக்கும்' என்று சொன்ன விஜய், தற்போது நடந்துவரும் தொடர் மின்வெட்டுக்கு என்ன பதில் சொல்லப்போகிறார்? தமிழக மக்களை இருளில் தவிக்கவிட வேண்டாம்' என நயினார் நாகேந்திரன் தனது அறிக்கையில் தெரிவித்துள்ளார்.
