நமது உடல் உறுப்புகளில் கண்களும் மிகவும் முக்கியமானவை. இதயம், கல்லீரல், நுரையீரல் போல கண்களும் ஆரோக்கியமாக இருக்க வேண்டியது அவசியம். கண்களில் பார்வை கோளாறுகள் ஏற்படாமலும், செல்கள் சேதமடையாமலும் இருக்க சில வகை உணவுப் பொருட்கள் உதவுகின்றன. கண்களை பாதிப்பில் இருந்து எப்படிப் பாதுகாப்பது என்பது குறித்து விரிவாகக் காண்போம்.
கண்களின் ஆரோக்கியத்திற்கு பல்வேறு வைட்டமின்களும் தாது உப்புகளும் அவசியமானவை. குறிப்பாக, வைட்டமின் ஏ பார்வை இழப்பைத் தடுக்க உதவுகிறது. வைட்டமின் சி கண்களுக்குள் ஏற்படும் நீர் அழுத்தமான குளூக்கோமா பாதிப்பைத் தடுக்கிறது. மேலும், பாதாம், சூரியகாந்தி விதைகள், வேர்க்கடலை, சர்க்கரை வள்ளிக்கிழங்கு, பீநட் பட்டர் போன்ற உணவுகள் கண்களின் செல்கள் சேதமடையாமல் பாதுகாக்கின்றன.
வைட்டமின் ஈ, வயோதிகத்தின் காரணமாக கண்களில் பாதிப்பு ஏற்படாமல் காக்கிறது. ப்ரோக்கோலி, ஸ்ட்ராபெர்ரி, ஆரஞ்சு போன்ற பழங்களில் உள்ள வைட்டமின் சி, ஒரு சக்திவாய்ந்த ஆக்ஸிஜனேற்ற தடுப்பானாக (ஆன்ட்டிஆக்ஸிடெண்ட்) செயல்படுகிறது. இந்த உணவுகள் கண்புரை மற்றும் முதுமையின் காரணமாக கண்களில் ஏற்படக்கூடிய பாதிப்புகளைத் தடுக்க உதவுகின்றன.
முட்டை மற்றும் கேரட்டில் உள்ள வைட்டமின் ஏ, மாலைக்கண் நோயைத் தடுப்பதோடு, கண்கள் வறண்டு போகாமல் பாதுகாக்கும். கண்களில் ஏற்படக்கூடிய சில பாதிப்புகளையும் இது குணப்படுத்தும். மேலும், முட்டை, காளான், சிறுமீன்கள் போன்றவற்றில் காணப்படும் வைட்டமின் டி சத்தும், முதுமையின் காரணமாக கண்ணில் பாதிப்பு ஏற்படாமல் காக்க உதவும்.
