மகாராஷ்டிர மாநிலம் லாத்தூர் மாவட்டம், கோண்டேகான் கிராமத்தைச் சேர்ந்த மைதிலி அசோக் சோன்வாலே (18) என்ற மாணவி, நீட் தேர்வு ரத்து செய்யப்பட்டதால் ஏற்பட்ட மன உளைச்சலில் தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது. கடந்த மே 16 அன்று, தனது விவசாயத் தோட்டத்தில் உள்ள மரத்தில் தூக்கிட்ட நிலையில் மாணவியின் உடல் மீட்கப்பட்டது.
மாணவியின் தந்தை அசோக் விட்டல் சோன்வாலே (50) கண்ணீர்மல்க அளித்த வாக்குமூலத்தில், 'என் மகள் மருத்துவராகி ஏழைகளுக்கு சேவை செய்ய வேண்டும் என்ற கனவுடன் படித்தாள். மே 3 அன்று நடந்த நீட் தேர்வை மிகச் சிறப்பாக எழுதினாள். ஆனால், தேர்வு ரத்து செய்யப்பட்டதாக வந்த அறிவிப்பால் அவள் மிகுந்த மனமுடைந்தாள். 'நன்றாகப் படித்தும் தேர்வு ரத்து செய்யப்பட்டதால் என் எதிர்காலம் என்னவாகும்' என்று பயத்துடன் கூறினாள். அந்த மன அழுத்தத்தைத் தாங்க முடியாமல் தற்கொலை செய்துகொண்டாள்' என்று தெரிவித்துள்ளார்.
இந்தச் சம்பவம் நீட் தேர்வு குறித்த விவாதங்களை மீண்டும் தீவிரப்படுத்தியுள்ளது. மாணவர்களின் எதிர்காலம் குறித்த அச்சமும், தேர்வு முறைகளில் உள்ள சிக்கல்களும் மீண்டும் ஒருமுறை வெளிச்சத்திற்கு வந்துள்ளன. மாணவர்களின் மன அழுத்தத்தைக் குறைக்கவும், அவர்களின் கனவுகளை நனவாக்கவும் உரிய நடவடிக்கைகள் எடுக்கப்பட வேண்டும் என்ற கோரிக்கை வலுத்துள்ளது.
உயிரிழந்த மாணவி மைதிலியின் உடல் பிரேத பரிசோதனைக்கு பின்னர் பெற்றோரிடம் ஒப்படைக்கப்பட்டு நல்லடக்கம் செய்யப்பட்டது. இந்த துயரச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
