தமிழ்நாடு லஞ்ச ஒழிப்புத் துறைக்கு (DVAC) திமுக சார்பில் இன்று ஒரு பரபரப்பான புகார் மனு அளிக்கப்பட்டுள்ளது. நீதிமன்றங்களில் அரசு சார்பாக வாதாடும் அரசு வழக்கறிஞர்கள் மற்றும் அரசு தரப்பு வழக்கறிஞர்களின் நியமனம் என்பது மிகவும் முக்கியத்துவம் வாய்ந்த பொதுப் பொறுப்பாகும். இந்த நியமனங்களில் நடக்கும் ஊழல் என்பது நிர்வாக முறைகேடு மட்டுமல்ல, அது சட்டத்தின் ஆட்சியையும், அரசியலமைப்புச் சட்டம் 14 மற்றும் 21-இன் கீழ் குடிமக்களுக்கு வழங்கப்பட்டுள்ள உரிமைகளையும், மக்களின் தீர்ப்பையும் நேரடியாகத் தாக்குவதாகும் என மனுவில் குறிப்பிடப்பட்டுள்ளது.
தகுதி, நேர்மை மற்றும் தொழில்முறைத் திறனுக்குப் பதிலாக, இந்தப் பதவிகள் விலைக்கு வாங்கப்படுவதாகவும், விருப்பமுள்ள வேட்பாளர்களிடம் சட்டவிரோதமாகப் பணம் கோரப்பட்டு, அதுவே தேர்வுக்கான முக்கிய தகுதியாக மாற்றப்பட்டிருப்பதாகவும் நம்பகமான தகவல்கள் மூலம் உறுதியாகத் தெரிய வந்துள்ளது. இது குறித்து தாயகம் கவி என்பவர் அளித்துள்ள புகாரில், தமிழ்நாடு அரசின் தலைமை வழக்கறிஞர் அலுவலகத்திற்கு நெருக்கமானவர் என்று கூறிக்கொள்ளும் ஒரு வழக்கறிஞர், அரசு வழக்கறிஞர் பதவிகளுக்கு விண்ணப்பிக்கும் வேட்பாளர்களிடம் அமைச்சர் புஸ்ஸி என். ஆனந்த் பெயரையும் அவரது ஆதரவையும் பயன்படுத்தி, இந்த நியமனங்கள் அனைத்தும் அவரது அதிகாரத்தின் கீழ் தான் ஒதுக்கப்படுகின்றன என்று கூறி, முறையற்ற வகையில் தொடர்ந்து பணம் கோரி வசூலித்து வருவதாகக் குறிப்பிட்டுள்ளார்.
இதேபோல், மதுரையிலும் அதைச் சுற்றியுள்ள மாவட்டங்களிலும் செயல்பட்டு வரும் மற்றொரு வழக்கறிஞர், தலைமை வழக்கறிஞர் அலுவலகத்திற்கு நெருக்கமானவர் என்று கூறிக்கொள்ளும் வழக்கறிஞருடன் கூட்டுச் சேர்ந்து, இந்த நியமனங்கள் அமைச்சர் என். ஆனந்த் மூலமாகவே கட்டுப்படுத்தப்பட்டு வழங்கப்படுகின்றன என்று கூறி விண்ணப்பதாரர்களிடம் பணம் வசூலித்து வருகிறார் என்றும் தெரிய வந்துள்ளது. இந்த இடைத்தரகர்களின் செயல்பாடு ஏதோ ஒரு தனிப்பட்ட அல்லது தற்செயலான நிகழ்வு அல்ல என்றும் தெரிவிக்கப்பட்டுள்ளது.
வெவ்வேறு மாவட்டங்களில் செயல்படும் ஒன்றுக்கும் மேற்பட்ட வசூல் முகவர்கள், பணம் கோருவதற்கு அமைச்சர் புஸ்ஸி என். ஆனந்த் மற்றும் அமைச்சர் நிர்மல் குமார் ஆகியோரின் பெயர்களையும் தொடர்ந்து பயன்படுத்துவது, அமைச்சர்களின் அலுவலகங்கள் இந்த நியமனங்களுக்குப் பின்னணியாகப் பயன்படுத்தப்படுகின்றன அல்லது பயன்படுத்த அனுமதிக்கப்படுகின்றன என்பதற்கான வலுவான சூழ்நிலை ஆதாரமாகும் என மனுவில் சுட்டிக்காட்டப்பட்டுள்ளது. எனவே, குறிப்பிட்ட வழக்கறிஞர்கள் மற்றும் அவர்களுடன் தொடர்புடைய நபர்களால் வசூலிக்கப்பட்ட ஒவ்வொரு ரூபாயின் பணப் பரிவர்த்தனையையும் (வங்கி கணக்குகள், ரொக்கப் புழக்கம், அழைப்பு விவரப் பதிவுகள் மற்றும் பணம் கொடுத்த வேட்பாளர்களின் சாட்சியங்கள் மூலம்) லஞ்ச ஒழிப்புத் துறை விரிவாகக் கண்டறிய வேண்டும் என்று கோரப்பட்டுள்ளது.
இந்தத் தொகைகள் அமைச்சர் புஸ்ஸி என். ஆனந்த் மற்றும் அமைச்சர் சி.டி.ஆர். நிர்மல் குமார் ஆகியோரைச் சென்றடைந்ததா, அவர்களுக்குப் பலனளித்ததா அல்லது அவர்களின் அறிவுறுத்தலின் பேரில் விநியோகிக்கப்பட்டதா என்பதைத் தீர்க்கமாக நிறுவி, இந்தச் சங்கிலித்தொடரில் உள்ள ஒவ்வொரு நபரையும் ஊழல் தடுப்புச் சட்டத்தின் கீழ் விதிவிலக்கின்றி தண்டிக்க வேண்டும் என்றும் வலியுறுத்தப்பட்டுள்ளது. ஒட்டுமொத்தமாகப் பார்க்கும்போது, இவை ஏதோ தனித்தனியாக மாவட்ட அளவில் நடந்த தவறுகள் அல்ல என்றும், விழுப்புரம், திருப்பத்தூர், மதுரை மற்றும் தர்மபுரி ஆகிய மாவட்டங்களில் ஒரே மாதிரியான முறைகேட்டு நடைமுறைதான் பின்பற்றப்பட்டுள்ளன என்றும் தெரிவிக்கப்பட்டுள்ளது.
அதாவது அரசியல் ஆதரவைக் காட்டி இடைத்தரகர்கள் மூலம் பணம் கைமாறுகிறது; பணம் கொடுக்காத தகுதியான நபர்களின் விண்ணப்பங்கள் அமைதியாக நிராகரிக்கப்படுகின்றன. வெவ்வேறு மாவட்டங்களில் காணப்படும் இந்த ஒரே மாதிரியான முறை, இது அமைச்சர் புஸ்ஸி என். ஆனந்த் மற்றும் அமைச்சர் சி.டி.ஆர். நிர்மல் குமார் ஆகியோரின் அரசியல் ஆதரவுடன் மாநிலம் தழுவி ஒருங்கிணைந்து நடத்தப்படும் சட்டவிரோதப் பண வசூல் மற்றும் அதிகார துஷ்பிரயோகத் திட்டம் என்பதற்கான சான்றாகும்.
எனவே, இதனைத் தனித்தனி மாவட்டப் புகார்களாகப் பார்க்காமல், ஒரு கூட்டுச் சதித் திட்டமாக (Composite Conspiracy) லஞ்ச ஒழிப்புத் துறை விசாரிக்க வேண்டும் என்று தாயகம் கவி தனது புகாரில் கேட்டுக்கொண்டுள்ளார். இந்த புகார் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.
