கரூர்-கோவை தேசிய நெடுஞ்சாலையில் சாலை தடுப்பை சரிசெய்யும் பணியில் ஈடுபட்டிருந்த காவலர் ப. ரவிச்சந்திரன் மீது கட்டுப்பாட்டை இழந்த கார் மோதியதில் அவர் சம்பவ இடத்திலேயே உயிரிழந்தார்.
இந்த துயர சம்பவத்தைத் தொடர்ந்து, உயிரிழந்த காவலர் ப. ரவிச்சந்திரனின் குடும்பத்திற்கு தமிழக அரசு சார்பில் ரூ.30 லட்சம் நிதியுதவி வழங்கிட முதலமைச்சர் மு.க. ஸ்டாலின் உத்தரவிட்டுள்ளார். இது காவல்துறைக்கும் அவரது குடும்பத்தினருக்கும் ஈடுசெய்ய முடியாத பேரிழப்பு என்றும், அவரது குடும்பத்தினருக்கு ஆழ்ந்த இரங்கலையும் ஆறுதலையும் முதலமைச்சர் தெரிவித்துள்ளார்.
திருப்பூர் மாவட்டம், வெள்ளக்கோவில் காவல் நிலைய எல்லைக்குட்பட்ட கரூர்-கோவை தேசிய நெடுஞ்சாலையில், குறுக்கத்தி செக்போஸ்ட் அருகே இந்த கோர விபத்து நிகழ்ந்துள்ளது. வேகமாக வந்த லாரி ஒன்று சாலைத் தடுப்பில் மோதி விபத்துக்குள்ளானது. அந்த விபத்தில் சேதமடைந்த சாலைத் தடுப்பை, வெள்ளக்கோவில் காவல் நிலைய காவலர் ப. ரவிச்சந்திரன் (36 வயது) சீரமைத்துக் கொண்டிருந்தார். அப்போது, அவ்வழியாக அதிவேகத்தில் வந்துகொண்டிருந்த Xylo நான்கு சக்கர வாகனம் ஒன்று, கட்டுப்பாட்டை இழந்து காவலர் மீது மோதியது. இதில் சம்பவ இடத்திலேயே காவலர் ப. ரவிச்சந்திரன் பரிதாபமாக உயிரிழந்தார்.
காவலர் ப. ரவிச்சந்திரனின் திடீர் மறைவு தமிழ்நாடு காவல்துறைக்கும் அவரது குடும்பத்தினருக்கும் பெரும் அதிர்ச்சியையும், வேதனையையும் ஏற்படுத்தியுள்ளது. அவரது குடும்பத்தினரின் துயரத்தில் பங்கேற்பதாகவும், அவர்களுக்கு ஆறுதல் தெரிவிப்பதாகவும் முதலமைச்சர் ஸ்டாலின் தனது அறிக்கையில் குறிப்பிட்டுள்ளார். மேலும், உயிரிழந்த காவலரின் குடும்பத்திற்கு ரூ.30 லட்சம் நிவாரண நிதியை உடனடியாக வழங்கிடவும் அவர் உத்தரவிட்டுள்ளார்.
