கள்ளக்குறிச்சி மாவட்டம் வாணாபுரம் அருகே பாக்கம் கிராமத்தில் உள்ள மாரியம்மன் கோவிலில் கடந்த 24-ஆம் தேதி தொடங்கிய திருவிழாவின் முக்கிய நிகழ்வான தேரோட்டம் நேற்று நடைபெற்றது. அலங்கரிக்கப்பட்ட தேரில் அம்மன் எழுந்தருளியதும், திரளான பக்தர்கள் வடம் பிடித்து இழுக்கத் தொடங்கினர். சாலையின் வளைவுப் பகுதியில் தேர் சென்றபோது திடீரென ஒரு பக்கமாக சாய்ந்து அருகில் இருந்த வீட்டின் மீது விழுந்தது. இதனால் வீட்டின் மேற்கூரை சேதமடைந்தது. அதிர்ஷ்டவசமாக, அந்த நேரத்தில் வீட்டிற்குள்ளோ அல்லது அருகிலோ யாரும் இல்லாததால் பெரும் விபத்து தவிர்க்கப்பட்டது.
தேர் சாய்ந்ததால் அதிர்ச்சியடைந்த பக்தர்கள், சுமார் ஒரு மணி நேர போராட்டத்திற்குப் பிறகு கயிறுகள் மூலம் தேரை மீட்டனர். பின்னர், தேரோட்டம் தொடர்ந்து நடைபெற்றது. இந்த சம்பவம் அப்பகுதியில் பெரும் பரபரப்பை ஏற்படுத்தியது.
இது தொடர்பாக வடபொன்பரப்பி காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர். பக்தர்கள் மற்றும் அப்பகுதி மக்கள் மத்தியில் இந்த சம்பவம் அதிர்ச்சியை ஏற்படுத்தியுள்ளது.
கோவில் திருவிழாக்களில் இதுபோன்ற அசம்பாவிதங்கள் நடைபெறாமல் தடுக்க உரிய பாதுகாப்பு ஏற்பாடுகளை செய்ய வேண்டும் என பொதுமக்கள் கோரிக்கை விடுத்துள்ளனர். தேர் சாய்ந்ததில் யாருக்கும் காயம் ஏற்படாதது ஆறுதல் அளித்துள்ளது.
