பயறு வகைகளில் புரதச்சத்து அபரிமிதமாக நிறைந்துள்ளது. குறிப்பாக, பாசிப் பயறில் புரதம், கார்போஹைட்ரேட் மற்றும் கலோரிகள் சரியான விகிதத்தில் கலந்துள்ளன. நம் முன்னோர்கள் இந்த பயறை நன்கு வேகவைத்து, குழைவான பொங்கல் மற்றும் கூட்டு வகைகளைச் செய்து வந்துள்ளனர். பயத்தம் பருப்பை வேகவைத்த தண்ணீரில் உப்பும், காரமும் சேர்த்து அருந்தினால், நோயுற்றவர்கள் மற்றும் உடல் மெலிந்தவர்களுக்குக் களைப்பு நீங்கிப் புத்துணர்ச்சி கிடைக்கும்.
உபவாச நாட்களில், இலகுவான உணவாகப் பயற்றங்கஞ்சித் தெளிவுடன் பாலும், சர்க்கரையும் சேர்த்து அருந்துவது வழக்கம். இது எளிதில் ஜீரணமாவதோடு, உபவாசத்தால் அதிகரித்த பித்தத்தின் சீர்கேட்டையும் தணிக்க உதவும். மேலும், பச்சைப் பயறை வேகவைத்து, கடுகு, சின்ன வெங்காயம், தாளித்து உப்பு சேர்த்து, சப்பாத்திக்குத் தொட்டுக்கொள்ளும் கூட்டாகவும் பயன்படுத்தலாம். இது மிகுந்த சத்து நிறைந்தது.
தலையில் உள்ள அதிகப்படியான எண்ணெய் பசையை நீக்குவதற்குப் பச்சை பயறு தூள் மிகச் சிறந்த மருந்தாகும். இது தலைக்கும், கண்களுக்கும் குளிர்ச்சியைத் தருவதோடு, சிகைக்காய் ஒத்துக் கொள்ளாதவர்களுக்கு ஒரு சிறந்த மாற்றாகவும் அமைகிறது.
தினசரி உணவில் சிறிதளவு பச்சை பயறைச் சேர்த்துக்கொள்வதன் மூலம், உடலுக்குத் தேவையான இரும்புச்சத்து கிடைக்கிறது. இதனால் இரத்த சோகையில் இருந்து தப்பிக்கலாம். மேலும், பச்சை பயறு இரத்த அழுத்தத்தைக் கட்டுக்குள் வைத்திருக்கவும், கொலஸ்ட்ரால் அளவைக் குறைக்கவும் பெரிதும் உதவுகிறது. எனவே, அன்றாடம் பச்சை பயறு அல்லது பாசிப் பயறை உணவில் சேர்த்துக்கொள்வது உடல் நலத்திற்கு மிகவும் நல்லது.
