தங்கம் விலை மீண்டும் ராக்கெட் வேகத்தில் ஏறத் தொடங்கியுள்ளது. கடந்த மாதத்தில் சுமார் ரூ. 13 ஆயிரம் குறைந்திருந்த நிலையில், இந்த மாதத் தொடக்கத்தில் இருந்து விலையேற்றம் மீண்டும் சூடுபிடித்துள்ளது. சில நாட்களில் மட்டும் கிட்டத்தட்ட ரூ. 7 ஆயிரம் அதிகரித்துள்ள தங்கம் விலை, இனிவரும் நாட்களில் இன்னும் உயரும் என அச்சம் நிலவுகிறது.
தங்கம் விலை கடந்த சில நாட்களாகவே காலை, மாலை என இருவேளைகளிலும் உயர்ந்து வருகிறது. நேற்று காலை ஒரு கிராமுக்கு ரூ. 150 உயர்ந்த நிலையில், மாலையில் மீண்டும் ரூ. 150 உயர்ந்து ஒரு கிராம் ரூ. 13,550-க்கு விற்பனை செய்யப்பட்டது. இன்று காலை மேலும் ரூ. 150 உயர்ந்து ஒரு கிராம் ரூ. 13,700-க்கு விற்பனை செய்யப்படுகிறது.
அதேபோல், நேற்று காலை ஒரு சவரனுக்கு ரூ. 1,200 உயர்ந்த நிலையில், மாலை மீண்டும் ரூ. 1,200 உயர்ந்து ஒரு சவரன் ரூ. 1,08,400-க்கு விற்பனை செய்யப்பட்டது. இன்று காலை மேலும் ரூ. 1,200 அதிகரித்து ஒரு சவரன் ரூ. 1,09,600-க்கு விற்பனை செய்யப்படுகிறது.
தங்கத்தைப் போலவே வெள்ளி விலையும் தொடர் ஏற்றம் கண்டு வருகிறது. நேற்று காலை ஒரு கிராமுக்கு ரூ. 5 உயர்ந்த நிலையில், மாலையும் ரூ. 5 உயர்ந்து ஒரு கிராம் ரூ. 255-க்கு விற்கப்பட்டது. இன்று மீண்டும் ரூ. 5 உயர்ந்து ரூ. 260-க்கு விற்பனை செய்யப்படுகிறது. அதன்படி, இன்று வெள்ளி விலை கிலோவுக்கு ரூ. 5,000 அதிகரித்து ரூ. 2,60,000-க்கு விற்பனை செய்யப்படுகிறது.
