தமிழ் சினிமாவின் முன்னணி நடிகரான அருண் விஜய், இயக்குநர் முத்தையா இயக்கத்தில் புதிய படத்தில் நடித்து வருகிறார். இப்படத்தின் முதற்கட்ட படப்பிடிப்பு விறுவிறுப்பாக நடைபெற்று வரும் நிலையில், கதாநாயகி குறித்த முக்கிய தகவல் தற்போது வெளியாகியுள்ளது.
1995-ல் 'முறை மாப்பிள்ளை' படத்தின் மூலம் கதாநாயகனாக அறிமுகமான அருண் விஜய், 'என்னை அறிந்தால்' படத்தில் வில்லனாக நடித்து ரசிகர்களின் கவனத்தை ஈர்த்தார். தொடர்ந்து 'தடம்', 'குற்றம் 23', 'செக்கச் சிவந்த வானம்', 'மாபியா', 'வணங்கான்' போன்ற வெற்றிப் படங்களால் தனக்கென ஒரு தனி இடத்தைப் பிடித்துள்ளார். சமீபத்தில் அவரது 36-வது படமான 'ரெட்ட தல' வெளியானது. தற்போது, 'குட்டிப்புலி', 'கொம்பன்', 'மருது', 'விருமன்' போன்ற படங்களை இயக்கிய முத்தையா இயக்கத்தில் அவர் புதிய படத்தில் நடித்து வருகிறார்.
இந்தப் படத்தின் முதற்கட்ட படப்பிடிப்பு நடைபெற்று வரும் நிலையில், கதாநாயகி குறித்த தகவல் வெளியாகியுள்ளது. அதன்படி, சூப்பர்ஸ்டார் ரஜினிகாந்த் நடித்த 'ஜெயிலர்' திரைப்படத்தில் அவரது மருமகளாக நடித்த நடிகை மிர்ணா மேனன், இந்தப் படத்தில் அருண் விஜய்க்கு ஜோடியாக நடிக்க ஒப்பந்தமாகியுள்ளதாக தகவல்கள் தெரிவிக்கின்றன.
எனினும், மிர்ணா மேனனின் இந்தத் திரைப்படத்தில் இணைவது குறித்து படக்குழு சார்பில் இதுவரை அதிகாரப்பூர்வ அறிவிப்பு எதுவும் வெளியிடப்படவில்லை. விரைவில் இதுகுறித்த அறிவிப்பு வெளியாகும் என எதிர்பார்க்கப்படுகிறது. இதனால் ரசிகர்கள் மத்தியில் எதிர்பார்ப்பு அதிகரித்துள்ளது.
