நமது இதயம் சீராக இயங்குவதற்கு சில குறிப்பிட்ட உணவுகள் மிகவும் அவசியமானவை. உடலில் உள்ள ஒவ்வொரு உறுப்புக்கும் அதன் செயல்பாட்டிற்கு ஏற்ப சிறப்பு உணவுகள் உள்ளன. அந்த வகையில், இதயம் சிறப்பாக செயல்பட உதவும் உணவுகள் பற்றி விரிவாக காண்போம்.
இரும்புச்சத்து குறைபாடு இதயத்திற்கு ஆபத்தானது. இதயப் படபடப்பு, இரும்புச்சத்து குறைவின் முக்கிய அறிகுறியாக இருக்கலாம். உடலில் ஹீமோகுளோபின் அளவு குறையும்போது, திசுக்களுக்குத் தேவையான ஆக்சிஜன் செல்வது தடைபடும். இதனால், போதுமான ஆக்சிஜனை வழங்க இதயம் அதிகமாக உழைக்க வேண்டியிருக்கும். இது இதயத் துடிப்பு சீரற்று வேகமாகத் துடிக்க வழிவகுக்கும். உரிய சிகிச்சை அளிக்கப்படாவிட்டால், இதயம் வீங்கி செயலிழக்கும் அபாயம் உள்ளது. சரும வறட்சி, கூந்தல் பாதிப்பு, நகங்கள் உடைதல் போன்றவையும் இரும்புச்சத்து குறைபாட்டின் அறிகுறிகளாகும்.
இதய ஆரோக்கியத்திற்கு இரும்புச்சத்து நிறைந்த உணவுகளான கம்பு, கேழ்வரகு, அவல் போன்றவற்றை அன்றாட உணவில் சேர்த்துக்கொள்ள வேண்டும். மேலும், முளைகட்டிய கோதுமை, வறுத்த கடலை, வறுத்த பட்டாணி, சோயாபீன்ஸ், காராமணி போன்றவையும் இதயத்திற்குத் தேவையான அயன் சத்தை அளிக்கின்றன.
இதயம் சிறப்பாக இயங்க பீன்ஸ், வெங்காயத்தாள், வாழைக்காய், சுண்டைக்காய், காலிஃபிளவர், மணத்தக்காளி போன்ற காய்கறிகளையும் சேர்த்துக்கொள்ளலாம். முள்ளங்கிக் கீரை, பசலைக்கீரை, முட்டை, ஆட்டு ஈரல், சிறுமீன்கள், பாதாம், முந்திரி, கொப்பரைத் தேங்காய், தர்பூசணி விதை போன்ற அயன் நிறைந்த பொருட்களும் இதயத்திற்கு நன்மை பயக்கும். நெல்லிக்காய், பேரீச்சை, கொய்யா, கொடுக்காப்புளி, அன்னாசி, மாதுளை, உலர்திராட்சை, சீத்தாப்பழம், கேரட், கருணைக்கிழங்கு போன்ற பழங்கள் மற்றும் கிழங்குகளும் இதய ஆரோக்கியத்திற்கு உறுதுணையாக இருக்கும்.
