இந்திய கிரிக்கெட் ஜாம்பவான்களான ராகுல் டிராவிட் மற்றும் வீரேந்திர சேவாக் ஆகியோரின் மகன்கள், அண்டர்-19 கிரிக்கெட் போட்டியில் ஒரே அணியில் களமிறங்கி அசத்தியுள்ளனர். ராஜ்கோட்டில் நடைபெற்ற இந்தியா – ஆஸ்திரேலியா அணிகளுக்கு இடையிலான அதிகாரப்பூர்வமற்ற ஒருநாள் போட்டியின்போது இந்த சுவாரஸ்யமான நிகழ்வு அரங்கேறியது.
மழை காரணமாக ஆட்டம் பாதிக்கப்பட்ட நிலையில், ராகுல் டிராவிட்டின் 17 வயது மகன் அன்வே டிராவிட், 6-வது விக்கெட் கீப்பர் பேட்டராக களமிறங்கினார். களமிறங்கியது முதலே அதிரடியாக விளையாடிய அன்வே, வெறும் 18 பந்துகளில் 2 பவுண்டரிகள் மற்றும் 3 சிக்சர்களுடன் 38 ரன்களைக் குவித்தார். அவரது ஸ்ட்ரைக் ரேட் 211.11 ஆக இருந்தது. யாஷ்பர்தன் சவுகானுடன் இணைந்து 4-வது விக்கெட்டுக்கு 34 பந்துகளில் 69 ரன்களைச் சேர்த்தார். இந்திய அணியில் அதிகபட்சமாக யாஷ்பர்தன் சவுகான் 34 பந்துகளில் 54 ரன்கள் எடுத்தார். இதன் மூலம் இந்திய அணி 6 விக்கெட் இழப்பிற்கு 182 ரன்கள் எடுத்தது.
மறுபுறம், வீரேந்திர சேவாக்கின் மூத்த மகன் ஆர்யவீர் சேவாக், இந்திய அண்டர்-19 அணியில் தொடக்க வீரராக அறிமுகமானார். தனது தந்தையைப் போலவே, ஆர்யவீர் சேவாக்கும் தொடக்கத்தில் இருந்தே பவுண்டரிகளை விளாசினார். அவர் 26 பந்துகளில் 5 பவுண்டரிகளுடன் 28 ரன்கள் எடுத்து சிறப்பான தொடக்கத்தை அளித்தார். கேப்டன் லக்ஷ்யா ராஜேஷுடன் இணைந்து முதல் விக்கெட்டுக்கு 6.1 ஓவர்களில் 45 ரன்களைக் குவித்தார்.
முன்னதாக, அன்வே டிராவிட் ஜூலை மாதம் இலங்கைக்கு எதிரான போட்டியில் 67 பந்துகளில் 87 ரன்கள் குவித்து அனைவரின் கவனத்தையும் ஈர்த்திருந்தார். அதேபோல், ஆர்யவீர் சேவாக் டெல்லி பிரீமியர் லீக் தொடரில் தனது ஆட்டத்திறனை வெளிப்படுத்தி ரசிகர்களின் பாராட்டுகளைப் பெற்றார்.
இந்திய கிரிக்கெட்டை ஒரு காலத்தில் தங்கள் அதிரடி ஆட்டத்தால் ஆட்சி செய்த ராகுல் டிராவிட் மற்றும் வீரேந்திர சேவாக் ஆகியோரின் மகன்கள், தற்போது அதே மைதானத்தில் ஒன்றாக விளையாடி வருவது கிரிக்கெட் ரசிகர்களிடையே பெரும் வரவேற்பைப் பெற்றுள்ளது. இது பழைய கால கிரிக்கெட் ரசிகர்களுக்கு ஒரு நெகிழ்ச்சியான தருணமாக அமைந்துள்ளது.
இந்த இளம் வீரர்களின் திறமை, எதிர்காலத்தில் இந்திய கிரிக்கெட் அணிக்கு வலு சேர்க்கும் என எதிர்பார்க்கப்படுகிறது. பெற்றோரின் பாரம்பரியத்தை இவர்கள் தொடர்ந்து சிறப்பாக வெளிப்படுத்துவார்கள் என்ற நம்பிக்கை ரசிகர்களிடையே பரவலாக உள்ளது.
