தொடர்ந்து ஒரே இடத்தில் அமர்ந்து வேலை செய்வதால் உடல் எடை அதிகரித்து முதுகு வலி ஏற்படுவது பொதுவான ஒன்றாகும். இந்த முதுகு வலிக்கு பல காரணங்கள் கூறப்பட்டாலும், அடிப்படை காரணங்கள் இரண்டு மட்டுமே. ஒன்று, இடைவட்டு விலகுவது (Disc prolapse). மற்றொன்று, முதுகு முள்ளெலும்புகளின் (Vertebrae) பின்புறமுள்ள அசையும் மூட்டுகளில் வீக்கம் ஏற்படுவது. இந்த காரணங்களால் தண்டுவட நரம்பு செல்லும் பாதை குறுகிவிடுகிறது.
முதுகு வலி நம்முடைய அன்றாட செயல்பாடுகளை முற்றிலுமாக முடக்கிவிடும் தன்மை கொண்டது. இதை குணமாக்க, ஒரே இடத்தில் அமர்ந்திருப்பதை தவிர்த்து, உடலுக்கு வேலை கொடுப்பது அவசியம். மேலும், சில குறிப்பிட்ட உணவுகளை அதிகமாக சாப்பிடுவதன் மூலமும் முதுகு வலியை தவிர்க்கலாம். சரிவிகித உணவு உடலுக்குக் கிடைக்கவில்லை என்றால், தேவையான ஊட்டச்சத்துகள் கிடைக்காமல் முதுகுவலி ஏற்பட வாய்ப்புள்ளது.
ஆகவே, முதுகு வலி வராமல் தடுக்க, எடையைக் குறைப்பதற்காக பட்டினி இருப்பதை தவிர்க்க வேண்டும். முதுகு வலி வந்தால், வைட்டமின் டி குறைபாடு ஒரு முக்கியமான காரணமாக இருக்கலாம். எனவே, முதுகு வலியை தவிர்க்க இரத்தத்தில் போதுமான அளவு வைட்டமின் டி இருக்கிறதா என்று சோதித்துப் பார்க்க வேண்டும். முதுகு வலியை தவிர்க்க 25 ஹைட்ராக்ஸி வைட்டமின் டியின் அளவு 50 முதல் 60 ng/ml என்ற அளவில் இருக்க வேண்டும்.
முதுகு வலியை தவிர்க்க முட்டை, பால், மீன், காளான் போன்ற உணவுகளை சாப்பிடுவதன் மூலம் வைட்டமின் டி சத்து உடலில் சேர வேண்டும். மேலும், தினமும் 2 தேக்கரண்டி அளவு கறுப்பு எள்ளை உணவுடன் சேர்த்துக்கொள்வது நல்லது. நாம் உண்ணும் கறுப்பு எள், நாம் சாப்பிடும் உணவிலிருந்து கால்சியம் சத்து உடலில் சேருவதற்கு உதவும்.
