விடுதலை சிறுத்தைகள் கட்சியில் இருந்து விலகிய முன்னாள் சட்டமன்ற உறுப்பினர் பனையூர் பாபு, திமுக தலைவர் மு.க.ஸ்டாலின் முன்னிலையில் தன்னை திமுகவில் இணைத்துக்கொண்டார். 2021 சட்டமன்ற தேர்தலில் விசிக சட்டமன்ற உறுப்பினராக இருந்த பனையூர் பாபுக்கு, 2026 தேர்தலில் போட்டியிட வாய்ப்பு வழங்கப்படாததால் அவர் அதிருப்தி அடைந்ததாக கூறப்படுகிறது. விசிகவின் தற்போதைய அரசுக்கு ஆதரவு தெரிவித்ததால், கட்சித் தலைவர் திருமாவளவன் மீது அதிருப்தி கொண்டு, அக்கட்சியில் இருந்து விலகி திமுகவுக்கு ஆதரவு தெரிவித்த பனையூர் பாபு, இன்று தனது ஆதரவாளர்களான 1200 பேருடன் திமுகவில் இணைந்தார்.
பனையூர் பாபுவை வரவேற்று பேசிய திமுக தலைவர் ஸ்டாலின், 'யாரையும் குறைத்து பேச வேண்டிய அவசியம் இல்லை. மாற்றான் தோட்டத்து மல்லிகைக்கும் மணம் இருக்கும் என்றவர் அறிஞர் அண்ணா. யாரையும் விமர்சிக்காத பனையூர் பாபு எதிர்கட்சியாக களப்பணியாற்ற திமுகவில் இணைந்துள்ளார். உழைப்பதற்கு தயாராக இருக்கிறோம் என வந்துள்ளார் பனையூர் பாபு. கொள்கைவாதியாக, போராளியாக கருத்துகளை முன் வைப்பவர் பனையூர் பாபு. வேறு கட்சியை விட்டு வந்தாலும் அரசியல் நாகரிகத்துடன் விமர்சிக்கக் கூடியவர் பாபு. அதற்கு அவரது அரசியல் பயணமே சாட்சியாக அமைந்திருக்கிறது' என புகழாரம் சூட்டினார்.
மேலும் பேசிய ஸ்டாலின், 'திமுக ஆட்சியில் இருப்பதை விட எதிர்கட்சியாக இருக்கும்போதுதான் அதிக வேலை இருக்கும். 6 மாதம் இல்லை, 5 மாதம் இல்லை, 4 மாதம் இல்லை, 3 மாதங்களாவது இந்த ஆட்சி தாங்குமா? என்ற கேள்விக்குறியோடுதான் இந்த ஆட்சி நடந்து கொண்டிருக்கிறது. இந்த ஆட்சி பொறுப்பேற்றபோது நான் சொன்னேன்… 6 மாதங்களுக்கு இத பத்தி பேசப்போறது இல்லை என்று… ஆனால் 6 மாதங்களுக்கு முன் பேச வேண்டிய சூழல் வந்துவிடுமோ என்ற அச்சம் வந்துவிட்டது' என்று தற்போதைய அரசை கடுமையாக விமர்சித்தார்.
முன்னாள் விசிக சட்டமன்ற உறுப்பினர் பனையூர் பாபு, தனது ஆதரவாளர்களுடன் திமுகவில் இணைந்த நிகழ்வு அரசியல் வட்டாரத்தில் முக்கியத்துவம் பெற்றுள்ளது. திமுக தலைவர் ஸ்டாலின், தற்போதைய அரசை கடுமையாக விமர்சித்ததுடன், எதிர்கட்சியாக செயல்பட திமுக தயாராக இருப்பதாகவும் தெரிவித்தார். இந்த அரசியல் நகர்வுகள் வரும் காலங்களில் தமிழக அரசியலில் தாக்கத்தை ஏற்படுத்தும் என எதிர்பார்க்கப்படுகிறது.
