செங்கல்பட்டு மாவட்டம் மறைமலை நகரைச் சேர்ந்த பத்மாவதி என்ற 55 வயது பெண், கடந்த 2023 மே 25ஆம் தேதி இரவு 8.30 மணியளவில், மறைமலை நகர் நகராட்சி அலுவலகம் அருகே சாலையில் நடந்து சென்று கொண்டிருந்தார். அப்போது, அதிவேகமாகவும் கவனக்குறைவாகவும் எதிர் திசையில் வந்த யூடியூபர் இர்பானுக்கு சொந்தமான சொகுசு கார் அவர் மீது பலமாக மோதியது. இந்த கோர விபத்தில், சம்பவ இடத்திலேயே பத்மாவதி பரிதாபமாக உயிரிழந்தார்.
பத்மாவதியின் குடும்பத்தினர், இந்த விபத்து தொடர்பாக உரிய இழப்பீடு கோரி சென்னை மோட்டார் வாகன விபத்து இழப்பீட்டு தீர்ப்பாயத்தில் வழக்கு தொடர்ந்தனர். இந்த வழக்கு நீதிபதி எ.பி. நஷீர் அலி முன்னிலையில் விசாரணைக்கு வந்தது. அப்போது, காப்பீட்டு நிறுவனம் தரப்பில், 'விபத்து ஏற்பட பத்மாவதியின் கவனக்குறைவும் ஒரு காரணம். மேலும், விபத்தின் போது காரை ஓட்டியவரிடம் முறையான ஓட்டுநர் உரிமம் இல்லை. எனவே, இழப்பீடு வழங்குவதில் இருந்து தங்களை விடுவிக்க வேண்டும்' என்று வாதிடப்பட்டது.
ஆனால், காப்பீட்டு நிறுவனத்தின் வாதத்தை ஏற்க மறுத்த நீதிபதி, முக்கிய உத்தரவுகளைப் பிறப்பித்தார். வழக்கில் தாக்கல் செய்யப்பட்ட ஆவணங்கள் மற்றும் முதல் தகவல் அறிக்கையின் அடிப்படையில், கார் ஓட்டுநரின் கவனக்குறைவுதான் விபத்துக்கு முக்கிய காரணம் என உறுதி செய்யப்பட்டது. பத்மாவதி கவனக்குறைவாக சாலையைக் கடக்க முயன்றார் என்பதற்கான எந்த ஆதாரமும் நீதிமன்றத்தில் சமர்ப்பிக்கப்படவில்லை.
மேலும், விபத்தின் போது ஓட்டுநரிடம் உரிமம் இல்லை என்பதற்காக மட்டும், காப்பீட்டு நிறுவனம் இழப்பீடு வழங்குவதில் இருந்து விலக்கு பெற முடியாது என்றும் நீதிபதி தெளிவுபடுத்தினார். காப்பீட்டு நிறுவனம் முதலில் பாதிக்கப்பட்ட குடும்பத்திற்கு இழப்பீட்டை வழங்கிவிட்டு, பின்னர் அந்தத் தொகையை கார் உரிமையாளரான யூடியூபர் இர்பானிடம் இருந்து வசூலித்துக் கொள்ளலாம் என்றும் உத்தரவிட்டார்.
விபத்தில் உயிரிழந்த பத்மாவதி, ஒரு தனியார் மருத்துவமனையில் பணியாற்றி வந்தவர். அவரது எதிர்கால வருவாய் இழப்பு மற்றும் பிற காரணங்களைக் கருத்தில் கொண்டு, 'இண்டஸ் இண்ட் ஜெனரல் இன்சூரன்ஸ்' நிறுவனம், 30 நாட்களுக்குள் மனுதாரருக்கு ரூ.30.69 லட்சம் இழப்பீடாக வழங்க வேண்டும் என்றும் நீதிபதி உத்தரவிட்டார். இந்த உத்தரவு, சாலைப் பாதுகாப்பு குறித்த விழிப்புணர்வை ஏற்படுத்தியுள்ளது.
