வாட்ஸ்அப் பயனர்களின் தனியுரிமையைப் பாதுகாக்கும் வகையில், புதிய 'பயனர் பெயர்' (Username) வசதியை அறிமுகப்படுத்தியுள்ளது. இதன் மூலம், உங்கள் மொபைல் எண்ணைப் பகிராமலேயே மற்றவர்களுடன் எளிதாக உரையாடலாம்.
இதுவரை வாட்ஸ்அப்பில் புதிய உரையாடலைத் தொடங்க மொபைல் எண்களைப் பரிமாறிக்கொள்வது அவசியமாக இருந்தது. இதனால் தனிப்பட்ட எண்கள் தேவையில்லாதவர்களுக்கும் தெரியவரும் சூழல் நிலவியது. ஆனால், இன்ஸ்டாகிராம், எக்ஸ் போன்ற தளங்களைப் போலவே, இனி வாட்ஸ்அப்பிலும் தனித்துவமான 'யூசர்நேம்' மூலம் மற்றவர்களுடன் தொடர்புகொள்ள முடியும். இது குழந்தைகளின் பள்ளி பெற்றோர் குழுக்கள், அடுக்குமாடி குடியிருப்புக் குழுக்கள், ஆன்லைன் சந்தை பரிவர்த்தனைகள், பொது நிகழ்ச்சிகள் மற்றும் வணிக சந்திப்புகளில் புதிய நபர்களுடன் பேசும்போது மிகவும் பயனுள்ளதாக இருக்கும்.
உலகம் முழுவதும் 300 கோடிக்கும் அதிகமான மக்கள் வாட்ஸ்அப் பயன்படுத்துவதால், தங்களுக்குப் பிடித்தமான பயனர் பெயரை முன்பதிவு செய்ய வாட்ஸ்அப் தொடங்கியுள்ளது. உங்கள் வாட்ஸ்அப் செயலியைப் புதிய பதிப்பிற்கு அப்டேட் செய்து, Settings > Account > Username பகுதிக்குச் சென்று உங்களுக்குப் பிடித்த பெயரை டைப் செய்து முன்பதிவு செய்யலாம். ஒருவேளை நீங்கள் நினைத்த பெயர் கிடைக்கவில்லை என்றால், வாட்ஸ்அப் பரிந்துரைக்கும் மாற்றுப் பெயர்களைத் தேர்வு செய்யலாம். இந்த வசதி படிப்படியாக அனைவருக்கும் வழங்கப்பட்டு வருகிறது, உங்கள் கணக்கிற்கு இந்த வசதி கிடைத்ததும் வாட்ஸ்அப் உங்களுக்கு அறிவிப்பு அனுப்பும்.
வாட்ஸ்அப்பில் உங்களைத் தேட பொதுவான தேடுபொறி எதுவும் இருக்காது. உங்களின் துல்லியமான பயனர் பெயர் தெரிந்தால் மட்டுமே ஒருவரால் உங்களுக்குச் செய்தியை அனுப்ப முடியும். இது தேவையற்ற ஸ்பேம் செய்திகளைத் தடுக்கும். மேலும், 'யூசர்நேம் கீ' என்ற ஆப்ஷனையும் வாட்ஸ்அப் வழங்குகிறது. இதை ஆன் செய்து வைத்தால், புதிய நபர் உங்கள் பயனர் பெயருடன் இந்த 'ரகசிய கீ'-யையும் டைப் செய்ய வேண்டும். இந்த கீ-யை மாற்றிக்கொள்ளும் வசதி இருப்பதால், உங்கள் பயனர் பெயர் தெரியவந்தாலும் யாரும் உங்களைத் தொந்தரவு செய்ய முடியாது. ஏற்கனவே இன்ஸ்டாகிராம், ஃபேஸ்புக்கில் பிரபலமாக இருக்கும் நிறுவனங்கள் மற்றும் கன்டென்ட் கிரியேட்டர்கள், தங்களின் பிராண்ட் அடையாளத்தை மாற்றாமல் இருக்க, அதே பயனர் பெயரை வாட்ஸ்அப்பிலும் முன்பதிவு செய்ய மெட்டா வழிவகை செய்துள்ளது. இந்த அம்சம் ஆண்டின் பிற்பகுதியில் முழுமையாகச் செயல்பாட்டுக்கு வந்தாலும், தற்போதைய சாட்கள் மற்றும் ஏற்கனவே உள்ள தொடர்புகள் வழக்கம் போல் செயல்படும். புதிய நபர்களிடம் பேசும்போது மட்டுமே இந்த பயனர் பெயர் விதிமுறை பொருந்தும். இந்த புதிய அம்சம் ஆன்லைன் உலகை மேலும் பாதுகாப்பானதாக மாற்றும் என்பதில் சந்தேகமில்லை.
