இந்திய சினிமாவின் முன்னணி இயக்குநர்களில் ஒருவரான அட்லீ, தற்போது நடிகர் அல்லு அர்ஜுனை வைத்து 'ராக்கா' என்ற புதிய படத்தை இயக்கி வருகிறார். இந்த நிலையில், அட்லீ மற்றும் அவரது மனைவி பிரியா அட்லீ இணைந்து நடத்தும் 'A for Apple' தயாரிப்பு நிறுவனம் மூலம் நடிகர் விஜய் சேதுபதியின் புதிய திரைப்படம் தயாரிக்கப்பட உள்ளதாக தகவல் வெளியாகியுள்ளது.
இயக்குநர் ஷங்கரின் உதவி இயக்குநராக தனது திரையுலக பயணத்தை தொடங்கிய அட்லீ, 'ராஜா ராணி' படத்தின் மூலம் இயக்குநராக அறிமுகமானார். முதல் படமே வெற்றி பெற்றதை தொடர்ந்து, நடிகர் விஜய்யுடன் இணைந்து 'தெறி', 'மெர்சல்', 'பிகில்' போன்ற வெற்றிப் படங்களை கொடுத்தார். தமிழில் தொடர்ச்சியாக ஹிட் படங்களை கொடுத்த அட்லீ, 2023-ம் ஆண்டு ஷாருக்கான், நயன்தாரா நடிப்பில் வெளியான 'ஜவான்' திரைப்படம் மூலம் பாலிவுட்டிலும் மாபெரும் வெற்றியை பதிவு செய்தார். இப்படம் உலகளவில் ரூ.1,100 கோடிக்கும் அதிகமாக வசூல் செய்து சாதனை படைத்தது.
'ராக்கா' படத்தில் தீபிகா படுகோனே, அனுஷ்கா ஷர்மா, மிருணாள் தாக்கூர் போன்ற முன்னணி நடிகைகள் நடிக்க உள்ளதாக தகவல்கள் வெளியாகியுள்ளன. இந்த படங்களைத் தொடர்ந்து, அட்லீ தனது மனைவி பிரியா அட்லீயுடன் இணைந்து விஜய் சேதுபதியின் புதிய படத்தை தயாரிக்க உள்ளார்.
இதற்கான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது. இதற்கு முன்னர், அட்லீ இயக்கிய 'ஜவான்' திரைப்படத்தில் விஜய் சேதுபதி வில்லன் கதாபாத்திரத்தில் நடித்திருந்தது குறிப்பிடத்தக்கது.
