தமிழக வெற்றிக் கழக (த.வெ.க.) ஆட்சியில் சட்டம்-ஒழுங்கு முற்றிலும் சீர்குலைந்துவிட்டதாக தேசிய பா.ஜ.க. கடுமையாக விமர்சித்துள்ளது. தேனி சிறையிலிருந்து 17 கைதிகள் தப்பிச் சென்றது, மாநிலம் முழுவதும் குழந்தைகள் காணாமல் போவது போன்ற சம்பவங்களை சுட்டிக்காட்டி, 'இதற்காகவா மக்கள் வாக்களித்தார்கள்?' என பா.ஜ.க. கேள்வி எழுப்பியுள்ளது.
தேசிய பா.ஜ.க. தனது அதிகாரப்பூர்வ எக்ஸ் (X) வலைதளப் பக்கத்தில் இந்த விமர்சனத்தைப் பதிவு செய்துள்ளது. இது தொடர்பாக வெளியிடப்பட்ட வீடியோவில், முதல்-அமைச்சர் விஜய் நடித்த 'கத்தி' திரைப்படத்தில் வரும் ஒரு காட்சியை குறிப்பிட்டு, தற்போதைய ஆட்சியில் சட்டம்-ஒழுங்கு சீர்குலைந்துள்ளதை ஒப்பிட்டு பேசியுள்ளது.
அந்த வீடியோவில், '23-ம் தேதி இரண்டு கைதிகள் சென்னை புழல் மத்திய சிறையில் இருந்து தப்பித்தனர். இந்த சிறையை தமிழ்நாடு முதல்-அமைச்சர் விஜய், ஆகஸ்ட் 28-ம் தேதி ஆய்வு செய்திருந்தார். ஆனால், அது வெறும் தொடக்கம்தான். 26-ம் தேதி (திங்கள் கிழமை) தேனி சிறையில் இருந்து 17 கைதிகள் சிறை காவலர்களை தாக்கிவிட்டு தப்பித்துள்ளனர்' என்று தெரிவிக்கப்பட்டுள்ளது.
மேலும், 'த.வெ.க. அமைச்சர்களும், கூட்டணியினரும் பிரபலத்திற்காக ரீல்ஸ் வெளியிட்டுக்கொண்டிருக்க, த.வெ.க. – காங்கிரஸ் கூட்டணி ஆட்சியில் தமிழ்நாடு சட்டம் ஒழுங்கு சீர்குலைந்துள்ளது. முதல்-அமைச்சர் விஜய், தனது பிரச்சாரத்தில் பெண்கள் மற்றும் குழந்தைகள் பாதுகாப்பு தனது ஆட்சியில் சிறப்பாக இருக்கும் என பிரச்சாரம் மேற்கொண்டார். ஆனால், தற்போது அவர்களின் பாதுகாப்பு கேள்விக்குறியாக உள்ளது' என்றும் அந்த வீடியோவில் விமர்சிக்கப்பட்டுள்ளது.
காவல்துறையை தன் கையில் வைத்திருக்கும் முதல்-அமைச்சர் விஜய், குற்றங்கள் மீதான நடவடிக்கை முற்றிலும் காணாமல் போயுள்ளது என்றும், இதுதான் தமிழ்நாடு மக்கள் எதிர்பார்த்தார்களா என்றும், இதற்காகவா அவர்கள் தங்கள் வாக்குகளை செலுத்தினார்கள் என்றும் பா.ஜ.க. கேள்வி எழுப்பியுள்ளது. 'இந்த அரசாங்கத்தின் வெட்கக்கேடு' என்றும் அந்தப் பதிவில் குறிப்பிடப்பட்டுள்ளது.
இதுவரை தேசிய பா.ஜ.க. சார்பில் த.வெ.க. அரசை நேரடியாக விமர்சனம் செய்யாதநிலையில், முதன்முறையாக இந்த பதிவு வெளியிடப்பட்டுள்ளது. இது தமிழக அரசியல் வட்டாரத்தில் முக்கியத்துவம் பெற்றுள்ளது. முதல்-அமைச்சர் விஜய்யின் அரசு மீது பா.ஜ.க. முன்வைத்துள்ள குற்றச்சாட்டுகள் பெரும் விவாதத்தை ஏற்படுத்தியுள்ளது.
பா.ஜ.க.வின் இந்த விமர்சனத்திற்கு த.வெ.க. தரப்பிலிருந்து இதுவரை எந்தவிதமான பதிலும் வரவில்லை. இருப்பினும், இந்த விவகாரம் தமிழக அரசியலில் ஒரு புதிய திருப்பத்தை ஏற்படுத்தியுள்ளது. மக்கள் நலன் சார்ந்த பிரச்சனைகளில் அரசின் கவனம் சிதறியுள்ளதாக பா.ஜ.க. குற்றம் சாட்டியுள்ளது.
சட்டம்-ஒழுங்கு பிரச்சனைகள் குறித்து பா.ஜ.க. தொடர்ந்து குரல் கொடுத்து வரும் நிலையில், தற்போதைய சம்பவங்கள் அரசின் மீது மேலும் அழுத்தத்தை ஏற்படுத்தியுள்ளது. முதல்-அமைச்சர் விஜய் தலைமையிலான அரசு இந்த சவால்களை எவ்வாறு எதிர்கொள்ளப் போகிறது என்பதை பொறுத்திருந்துதான் பார்க்க வேண்டும்.
