திருப்பதி கோவிந்தராஜ சுவாமி கோவிலில் வருடாந்திர பிரம்மோற்சவ விழா வெகு விமரிசையாக நடைபெற்று வருகிறது. விழாவின் மூன்றாம் நாளான இன்று காலை, உற்சவர் கோவிந்தராஜ சுவாமி சிறப்பு அலங்காரத்தில் சிம்ம வாகனத்தில் எழுந்தருளி கோவிலின் நான்கு மாட வீதிகளில் வீதி உலா வந்து பக்தர்களுக்கு அருள் பாலித்தார். காலை 7 மணி முதல் 9 மணி வரை நடைபெற்ற இந்த நிகழ்வில், பக்தர்கள் கோவிந்த நாம கோஷம் எழுப்பியும், வேத மந்திரங்கள் ஓதப்பட்டும், மங்கள வாத்தியங்கள் இசைக்கப்பட்டும், கலை நிகழ்ச்சிகள் நடைபெற்றும் வந்தன. மாட வீதிகள் விழாக்கோலம் பூண்டிருந்தது.
நேற்று, பிரம்மோற்சவ விழாவின் இரண்டாம் நாள் அன்று, காலை 7 மணியில் இருந்து 9 மணி வரை சிறிய சேஷ வாகனத்தில் உற்சவர் கோவிந்தராஜர் சிறப்பு அலங்காரத்தில் மாட வீதிகளில் உலா வந்து பக்தர்களுக்கு அருள்பாலித்தார். இந்த வாகன சேவையின் போது வேதப் பாராயணம், நாலாயிர திவ்யப் பிரபந்தம் ஓதப்பட்டதுடன், மங்கள வாத்தியங்கள் இசைக்கப்பட்டு, கலைஞர்கள் கோலாட்டம் ஆடினர். பக்தர்கள் பக்திப் பாடல்களைப் பாடினர். சாமி வீதி உலா வந்தபோது பக்தர்கள் தேங்காய் உடைத்தும், கற்பூர, நெய் ஆரத்தி காண்பித்தும் கோவிந்த கோஷம் எழுப்பி தரிசனம் செய்தனர்.
வாகன சேவை முடிந்ததும், கல்யாண மண்டபத்தில் உற்சவ மூர்த்திகளுக்கு பால், தயிர், தேன், சந்தனம் மற்றும் பழ ரசங்களால் ஸ்நாபன திருமஞ்சனம் செய்யப்பட்டது. இதில் திருமலை ஜீயர் சுவாமிகள், தேவஸ்தான அதிகாரிகள், அர்ச்சகர்கள் மற்றும் ஏராளமான பக்தர்கள் கலந்துகொண்டனர். நேற்று மாலை ஹம்ச வாகன சேவை நடைபெற்றது. இதில் கோவிந்தராஜ சுவாமி ஹம்ச வாகனத்தின் மீது சரஸ்வதி தேவி அலங்காரத்தில் கையில் வீணையுடன் எழுந்தருளி மாட வீதிகளில் வலம் வந்து பக்தர்களுக்கு அருள்பாலித்தார். வாகன சேவைக்கு முன்னால் அலங்கரிக்கப்பட்ட காளைகள், குதிரைகள் மற்றும் யானைகள் ஊர்வலமாக சென்றன. பஜனைக் குழுக்கள் பஜனைப் பாடல்களைப் பாடியபடி சென்றனர். கோலாட்டம், நாட்டியம் போன்ற கலைநிகழ்ச்சிகளும் நடைபெற்றன.
இன்று மாலை 5.30 மணி முதல் 6.00 மணி வரை ஊஞ்சல் சேவையும், இரவு 7.00 மணி முதல் 9.00 மணி வரை பிரம்மாண்டமான முத்துப்பல்லக்கு சேவையும் நடைபெறும் என எதிர்பார்க்கப்படுகிறது. இந்த பிரம்மோற்சவ விழாவில் திருமலை திருப்பதி தேவஸ்தான அதிகாரிகள், ஜீயர்கள், கோயில் பணியாளர்கள், சேவகர்கள் மற்றும் திரளான பக்தர்கள் கலந்துகொண்டு சுவாமி தரிசனம் செய்து வருகின்றனர்.
