திருவண்ணாமலை அண்ணாமலையார் கோயிலில் பக்தர்களுக்கு வழங்கப்படும் பிரசாதங்களில் தயாரிப்பு மற்றும் காலாவதி தேதிகளை அச்சிட்டு ஒட்டும் பணி தீவிரமாக நடைபெற்று வருகிறது. இது பக்தர்களிடையே பெரும் வரவேற்பை பெற்றுள்ளது.
முன்னதாக, இந்து சமய அறநிலையத் துறை அமைச்சர் சீ.ரமேஷ் திருச்சி மாவட்டம் திருவாணைக்காவல் அகிலாண்டேஸ்வரி உடனுறை ஜம்புகேசுவரர் கோயிலில் ஆய்வு மேற்கொண்டார். அப்போது, கோயில் பிரசாத விற்பனை நிலையத்தில் உணவுப் பாதுகாப்பு விதிமுறைகள் முறையாக கடைபிடிக்கப்படுகிறதா என்றும், உணவுப் பொருட்களின் தயாரிப்பு மற்றும் காலாவதி தேதிகள் குறிப்பிடப்பட்டுள்ளதா என்றும் அவர் ஆய்வு செய்தார்.
இந்த ஆய்வின் போது, தேதிகள் குறிப்பிடப்படாமல் பிரசாதங்கள் விற்பனை செய்யப்படுவதைக் கண்டறிந்த அமைச்சர், உடனடியாக அனைத்து கோயில்களிலும் பிரசாதங்கள் மற்றும் உணவுப் பொருட்களை தயாரிப்பு மற்றும் காலாவதி தேதிகள் இன்றி விற்பனை செய்யக்கூடாது என உத்தரவிட்டார்.
அமைச்சரின் உத்தரவைத் தொடர்ந்து, திருவண்ணாமலை அண்ணாமலையார் கோயிலில் விற்பனை செய்யப்படும் பிரசாதங்களின் பாக்கெட்டுகளில் தயாரிப்பு மற்றும் காலாவதி தேதிகளை அச்சிட்டு ஒட்டும் பணியில் ஊழியர்கள் ஈடுபட்டுள்ளனர். இதற்கு முன்பு வரை, இங்கு விற்பனை செய்யப்பட்ட பிரசாதங்களில் இந்த தேதிகள் குறிப்பிடப்படாமல் இருந்தது குறிப்பிடத்தக்கது.
