மருத்துவப் படிப்பில் மாணவர் சேர்க்கைக்கான நீட் தேர்வை ரத்து செய்ய வேண்டும் என்றும், அதற்குப் பதிலாக 12ஆம் வகுப்பு மதிப்பெண்களின் அடிப்படையில் மாணவர்களைச் சேர்க்க மாநில அரசுகளுக்கு அனுமதி வழங்க வேண்டும் என்றும் மத்திய அரசை தமிழ்நாடு முதலமைச்சர் வலியுறுத்தியுள்ளார்.
தேசிய தேர்வு முகமை (NTA) நடத்திய நீட் தேர்வு, கடந்த மே 3ஆம் தேதி நாடு முழுவதும் 5,432 மையங்களில் நடைபெற்றது. தமிழ்நாட்டில் மட்டும் 31 நகரங்களில் இந்தத் தேர்வு நடந்தது. சுமார் 1.4 லட்சம் மாணவர்கள் உட்பட மொத்தம் 22 லட்சத்திற்கும் அதிகமான மாணவர்கள் இத்தேர்வில் பங்கேற்றனர். இருப்பினும், வினாத்தாள் கசிவு புகார் எழுந்ததைத் தொடர்ந்து, மத்திய அரசின் ஒப்புதலுடன் தேசிய தேர்வு முகமை தற்போது நடத்தப்பட்ட நீட் தேர்வை ரத்து செய்துள்ளது. இந்த விவகாரம் தற்போது மத்திய புலனாய்வு அமைப்பான சிபிஐ-யின் விசாரணைக்கு மாற்றப்பட்டுள்ளது.
நீட் தேர்வு ரத்து செய்யப்பட்டிருப்பது, நாடு முழுவதும் மருத்துவப் படிப்பில் சேரக் காத்திருக்கும் லட்சக்கணக்கான மாணவர்களின் நம்பிக்கையைச் சிதைத்துள்ளது. இது நீட் தேர்வின் நம்பகத்தன்மை கேள்விக்குள்ளாக்கப்படுவது முதல் முறையல்ல. கடந்த 2024ஆம் ஆண்டிலும் வினாத்தாள் கசிவு ஏற்பட்டது. இது தொடர்பாக ஆறு மாநிலங்களில் முதல் தகவல் அறிக்கைகள் பதிவு செய்யப்பட்டு, பின்னர் சிபிஐ-க்கு மாற்றப்பட்டன. உச்ச நீதிமன்றத்தின் வழிகாட்டுதலின்படி, முன்னாள் இஸ்ரோ தலைவர் டாக்டர் கே. ராதாகிருஷ்ணன் தலைமையில் அமைக்கப்பட்ட உயர்மட்ட நிபுணர் குழு, 95 சீர்திருத்தப் பரிந்துரைகளை வழங்கிய போதிலும், இரண்டே ஆண்டுகளில் மீண்டும் ஒருமுறை வினாத்தாள் கசிந்து, தேர்வு ரத்து செய்யப்பட்டுள்ளது. இது தேசிய அளவிலான தேர்வுகளில் உள்ள கட்டமைப்பு ரீதியான குறைபாடுகளுக்குச் சான்றாகும்.
நீட் தேர்வு அறிமுகப்படுத்தப்பட்ட காலத்திலிருந்தே, தமிழ்நாடு அரசு அதனைத் தொடர்ந்து ஒருமித்த குரலில் எதிர்த்து வருகிறது. நீட் தேர்வினால் கிராமப்புற மாணவர்கள், அரசுப் பள்ளி மாணவர்கள், தமிழ் வழிப் பயிற்றுமொழிப் பின்னணி கொண்டவர்கள் மற்றும் பொருளாதாரத்தில் பின்தங்கிய மாணவர்கள் கடுமையாகப் பாதிக்கப்பட்டுள்ளனர். எனவே, தமிழ்நாடு அரசின் நீண்ட நாள் கோரிக்கையான நீட் தேர்வை முழுமையாக ரத்து செய்து, MBBS, BDS மற்றும் ஆயூஷ் படிப்புகளில் மாநில ஒதுக்கீட்டின் கீழ் உள்ள அனைத்து இடங்களையும் 12ஆம் வகுப்பு மதிப்பெண்களின் அடிப்படையில் மாநிலங்களே நிரப்ப அனுமதிக்க வேண்டும் என்று மத்திய அரசை வலியுறுத்துகிறோம்.
