தமிழ்நாட்டில் முதலீடுகள் சரிந்துவிட்டதாக திமுக ஐடி விங் பரப்பி வரும் தகவல்களுக்கு, நடிகர் விஜய் தலைமையிலான தவெக ஐடி விங் தக்க பதிலடி கொடுத்துள்ளது. இது தொடர்பாக தவெக ஐடி விங் தனது எக்ஸ் தள பக்கத்தில் வெளியிட்டுள்ள பதிவில், "கொத்துஸ் ஐடி விங் கவனத்திற்கு" எனத் தொடங்கி, திமுகவின் குற்றச்சாட்டுகளுக்கு ஆதாரங்களுடன் மறுப்பு தெரிவித்துள்ளது.
முன்னாள் முதல்வர் ஸ்டாலின் தலைமையிலான திமுக அரசு, 2025-26 நிதியாண்டின் நான்காவது காலாண்டில் (Q4 FY26) ₹44,036.71 கோடி மதிப்பிலான 183 திட்டங்களைப் பெற்று, தேசிய அளவில் 6வது இடத்தில் இருந்ததாக திமுக ஐடி விங் கூறியுள்ளது. இதில் தனியார் துறையின் முதலீட்டுப் பங்களிப்பு மட்டும் 58 திட்டங்கள் மூலம் ₹31,935.37 கோடியாக இருந்ததாகவும் அவர்கள் குறிப்பிட்டுள்ளனர்.
ஆனால், நடிகர் விஜய் தலைமையிலான தவெக அரசு பொறுப்பேற்ற பிறகு, நடப்பு நிதியாண்டின் முதல் காலாண்டில் (Q1 FY27) தமிழ்நாட்டிற்கு வந்த மொத்த புதிய திட்டங்களின் மதிப்பு ₹11,236.73 கோடியாகக் குறைந்துள்ளதாகவும், இது முந்தைய காலாண்டுடன் ஒப்பிடுகையில் 74.48 சதவீத வீழ்ச்சி என்றும், தனியார் துறை முதலீட்டு முன்மொழிவுகள் ₹31,935.37 கோடியில் இருந்து ₹7,143.23 கோடியாக 77.63 சதவீதம் சரிந்துள்ளதாகவும், வெளிநாட்டுத் தனியார் முதலீட்டு முன்மொழிவுகள் ₹2,080 கோடியில் இருந்து ₹720 கோடியாகச் சரிந்துள்ளதாகவும், இதன் காரணமாக தேசிய அளவில் தமிழ்நாடு 17வது இடத்திற்குத் தள்ளப்பட்டுள்ளதாகவும் திமுக ஐடி விங் குற்றம் சாட்டியிருந்தது.
இதற்கு பதிலளித்துள்ள தவெக ஐடி விங், திமுகவின் குற்றச்சாட்டுகள் ப்ராஜெக்ட்ஸ் டுடே (Projects Today) என்ற தனியார் இணையதளத்தின் முழுமையற்ற மற்றும் தற்போதைய நிலவரத்திற்கேற்ப இல்லாத தரவுகளை அடிப்படையாகக் கொண்டு பரப்பப்படுவதாகக் கூறியுள்ளது. தமிழ்நாட்டில் முதலீடுகள் தொடர்பான அதிகாரப்பூர்வ தகவல்களை பராமரிக்கும் மாநில அரசின் முதலீட்டு மேம்பாட்டு முகமையான வழிகாட்டி நிறுவனம் வெளியிடும் தரவுகளே நம்பகமானவை என்றும் வலியுறுத்தியுள்ளது.
மேலும், தவெக அரசு பொறுப்பேற்ற முதல் காலாண்டிலேயே L&T குழுமத்துடன் ₹18,600 கோடி முதலீடு மற்றும் 8,200 இளைஞர்களுக்கு வேலைவாய்ப்பு உறுதி செய்யும் புரிந்துணர்வு ஒப்பந்தம் கையெழுத்திட்டதாகத் தெரிவித்துள்ளது. இதற்கு மாறாக, முந்தைய திமுக அரசு தனது முதல் காலாண்டில் (Q1 FY21) ஒரு புரிந்துணர்வு ஒப்பந்தம் கூட கையெழுத்திடவில்லை என அதிகாரப்பூர்வ பதிவுகள் காட்டுவதாகவும் தவெக ஐடி விங் சுட்டிக்காட்டியுள்ளது.
திமுக அரசு தனது முதல் ஆறு மாதங்களில் (H1 FY21) ₹21,021.54 கோடி மதிப்பிலான புரிந்துணர்வு ஒப்பந்தங்களில் மட்டுமே கையெழுத்திட்ட நிலையில், தவெக அரசு வெறும் 50 நாட்களிலேயே அந்த அளவை எட்டும் வகையில் செயல்பட்டுள்ளதாகவும் பெருமிதம் தெரிவித்துள்ளது. மேலும், Hitachi Energy, Vikram Solar, Chubb, Nordex, MotiveLink, University of Western Australia உள்ளிட்ட உலகத் தரம் வாய்ந்த நிறுவனங்களுடன் செய்யப்பட்ட ஒப்பந்தங்களையும் சேர்த்து, இதுவரை ₹35,062 கோடி மதிப்பிலான முதலீட்டு உறுதிமொழிகளைப் பெற்றுள்ளதாகவும், இது முந்தைய அரசின் செயல்திறனை ஏற்கனவே கடந்துவிட்டதாகவும் தவெக ஐடி விங் தெரிவித்துள்ளது.
2026 செப்டம்பர் மாதத்துடன் முடிவடையும் முதல் அரையாண்டிற்குள் இந்த முதலீட்டு எண்ணிக்கை மேலும் கணிசமாக உயரும் என்றும், அதன்பிறகு தவெக அரசின் முதலீட்டு ஈர்ப்பு சாதனை மேலும் வலுவாக வெளிப்படும் என்றும் நம்பிக்கை தெரிவித்துள்ளது. எனவே, ப்ராஜெக்ட்ஸ் டுடே இணையதளத்தில் குறிப்பிடப்பட்டுள்ள ₹7,143.23 கோடி என்ற முதலீட்டு விவரம் முழுமையற்றதும், தற்போதைய அதிகாரப்பூர்வ தகவல்களுடன் பொருந்தாததுமாகும் என்றும், முதலீடு தொடர்பான விவரங்களை மதிப்பிடும்போது மாநில அரசின் அதிகாரப்பூர்வ அமைப்பான வழிகாட்டி நிறுவனம் வெளியிடும் தரவுகளுக்கே முன்னுரிமை அளிக்கப்பட வேண்டும் என்றும் தவெக ஐடி விங் தனது பதிவில் திட்டவட்டமாகத் தெரிவித்துள்ளது.
