மழைக்காலம் தொடங்கியுள்ள நிலையில், கிராமங்கள் முதல் நகரங்கள் வரை புதர்கள், வீட்டின் பின்புறம் மற்றும் குப்பைகள் நிறைந்த பகுதிகளில் ஊர்வனவற்றின் நடமாட்டம் வழக்கத்தை விட அதிகரித்துள்ளது. குறிப்பாக இரவு நேரங்களில் எதிர்பாராதவிதமாக காலில் ஏதேனும் பட்டால், அது பெரும் அச்சத்தை ஏற்படுத்தும்.
இந்நிலையில், வீட்டுக்கு வெளியே விசில் போன்ற சத்தம் கேட்டால் உடனடியாக வெளியே ஓடிச் செல்ல வேண்டாம் என எச்சரிக்கப்பட்டுள்ளது. ஏனெனில், சில பாம்புகளும் இதுபோன்ற சத்தங்களை எழுப்பக்கூடியவை. தமிழ்நாட்டில் அதிகம் காணக்கூடிய 'பிக் 4' எனப்படும் நான்கு முதன்மை விஷப் பாம்புகள் மற்றும் அவை கடித்தால் செய்ய வேண்டிய உடனடி முதலுதவி நடவடிக்கைகள் குறித்து அனைவரும் அறிந்திருப்பது மிகவும் அவசியம்.
**நல்ல பாம்பு:** இந்த வகை பாம்புகள் மஞ்சள் அல்லது பழுப்பு நிறத்தில் காணப்படும். ஆபத்தை உணரும்போது, உடலின் முன்பகுதியை உயர்த்தி படம் எடுக்கும். தலையின் பின்புறம் 'யு' வடிவம் அல்லது கண்ணாடி போன்ற குறி காணப்படும். இந்த பாம்பின் விஷம் 'நியூரோடாக்ஸிக்' வகையைச் சார்ந்தது. இது மனிதர்களின் நரம்பு மண்டலத்தை நேரடியாகச் செயலிழக்கச் செய்யும் தன்மை கொண்டது.
**கண்ணாடி விரியன்:** முக்கோண வடிவ தலையைக் கொண்ட இந்தப் பாம்பின் உடல் முழுவதும் சங்கிலி போன்ற வட்ட வடிவப் புள்ளிகள் வரிசையாக அமைந்திருக்கும். தற்காப்புக்காக, குக்கர் விசில் அடிப்பது போன்ற உரத்த 'புஸ்' என்ற சீறல் ஒலியை எழுப்பும். இதன் விஷம் 'ஹீமோடாக்ஸிக்' வகையைச் சார்ந்தது. இது இரத்த ஓட்ட மண்டலத்தைப் பாதித்து, இரத்தக் கசிவு மற்றும் திசு சேதத்தை ஏற்படுத்தும்.
**கட்டுவிரியன்:** பளபளப்பான கருப்பு நிற உடலைக் கொண்ட இந்த பாம்பின் மீது வெள்ளை நிற இரட்டை வளையங்கள் குறுக்காகக் காணப்படும். பகல் நேரங்களில் அமைதியாகச் சுருண்டு கிடக்கும் இவை, இரவில் மிகவும் தீவிரமாக வேட்டையாடும். மிகவும் கொடிய நரம்பு மண்டல நச்சு (Neurotoxic) இந்த பாம்பில் உள்ளது. இவை வீடுகளுக்குள் எளிதாக நுழையக்கூடியவை என்பதால், இரவில் அதிக எச்சரிக்கை தேவை.
**சுருட்டை விரியன்:** சுமார் 1 முதல் 2 அடி வரை வளரக்கூடிய இந்த பாம்பின் தலையில் பிளஸ் (+) போன்ற அடையாளம் காணப்படும். ஆபத்து காலங்களில், தனது செதில்களை ஒன்றோடொன்று உரசி, ரம்பத்தால் மரத்தை அறுப்பது போன்ற ஒலியை எழுப்பும். அளவில் சிறியதாக இருந்தாலும், இதன் விஷம் இரத்த உறைதலைத் தடுத்து, உயிருக்கு ஆபத்தை விளைவிக்கும் தன்மை கொண்டது.
**பாம்பு கடித்தால் செய்ய வேண்டிய முதலுதவி:** பாம்பு கடித்த நபர் எந்தக் காரணத்தைக் கொண்டும் ஓடவோ, பதற்றமடையவோ கூடாது. பதற்றம் அடைந்தால் இதயத் துடிப்பு அதிகரித்து, விஷம் உடல் முழுவதும் வேகமாகப் பரவும். கடிபட்ட கை அல்லது காலை அசைக்காமல் நேராக வைத்திருக்க வேண்டும். நாட்டு வைத்தியம், பிளேடால் வெட்டுவது, கயிற்றால் இறுக்கக் கட்டுவது அல்லது வாயால் விஷத்தை உறிஞ்சுவது போன்ற ஆபத்தான செயல்களைத் தவிர்க்க வேண்டும். உடனடியாக அருகிலுள்ள அரசு மருத்துவமனைக்குச் சென்று விஷமுறிவு ஊசி செலுத்திக் கொள்வதே உயிரைக் காப்பாற்றும் ஒரே பாதுகாப்பான வழியாகும்.
