சிவகங்கை மாவட்டத்தில் காவிரி கூட்டுக் குடிநீர் மற்றும் ஜல்ஜீவன் திட்டங்கள் செயல்படுத்தப்பட்ட போதிலும், குடிநீர் பற்றாக்குறை நீடிப்பதாக பொதுமக்கள் புகார் தெரிவித்துள்ளனர். இதனால், மாவட்ட ஆட்சியர் தலைமையில் ஒரு குழு அமைத்து இப்பிரச்சினை குறித்து ஆய்வு செய்ய வேண்டும் என்ற கோரிக்கை வலுத்துள்ளது.
ராமநாதபுரம் காவிரி கூட்டுக் குடிநீர் திட்டத்தின் கீழ் சிவகங்கை நகராட்சி, திருப்பத்தூர், நெற்குப்பை, இளையான்குடி, சிங்கம்புணரி ஆகிய 4 பேரூராட்சிகள் மற்றும் 779 கிராமப்புற பகுதிகள் இணைக்கப்பட்டுள்ளன. மேலும், புதுக்கோட்டை கூட்டுக்குடிநீர் திட்டத்தின் மூலம் எஸ்.புதூர் ஒன்றியம் இணைக்கப்பட்டுள்ளது. சிவகங்கை மாவட்டத்திற்கென பிரத்யேகமாக ரூ.2,119.07 கோடியில் தொடங்கப்பட்ட காவிரி கூட்டுக் குடிநீர் திட்டப் பணிகள் கடந்த 2021 பிப்ரவரியில் தொடங்கி, இந்த ஆண்டு ஜனவரி 31 அன்று பயன்பாட்டிற்கு வந்தன. இத்திட்டத்தில் காரைக்குடி மாநகராட்சி, தேவகோட்டை, மானாமதுரை நகராட்சிகள் மற்றும் ஏற்கனவே ராமநாதபுரம் திட்டத்தில் இருந்த சிவகங்கை நகராட்சி ஆகியவை சேர்க்கப்பட்டுள்ளன.
புதிய திட்டத்தின் மூலம் 16.12 லட்சம் மக்களுக்கு தினமும் சராசரியாக 86.42 மில்லியன் லிட்டர் தண்ணீர் விநியோகிக்க முடியும் என தெரிவிக்கப்பட்டுள்ளது. இது தவிர, மாநகராட்சி, நகராட்சி, பேரூராட்சி மற்றும் கிராமப்புறங்களில் உள்ளூர் குடிநீர் திட்டங்களும் செயல்பட்டு வருகின்றன. மத்திய அரசின் ஜல்ஜீவன் திட்டத்தின் கீழ் வீடுகள்தோறும் குடிநீர் இணைப்பு வழங்கும் பணியும் நடைபெற்று வருகிறது. இதுவரை 2,53,781 வீடுகளுக்கு இணைப்பு வழங்கப்பட்டுள்ளதாக கூறப்படுகிறது. இருப்பினும், கோடை காலம் என்பதால் குடிநீர் தட்டுப்பாடு கடுமையாக இருப்பதாக மக்கள் சிரமத்திற்கு ஆளாகியுள்ளனர்.
இது குறித்து சிவகங்கை சமூக ஆர்வலர் ராஜாராமன் கூறுகையில், 'புதிய காவிரி கூட்டுக் குடிநீர் திட்டம் செயல்பாட்டில் இருந்தாலும், ஆங்காங்கே குழாய் உடைப்புகள் ஏற்படுகின்றன. மேலும், ஜல்ஜீவன் திட்டத்திலும் முறைகேடுகள் நடந்துள்ளன. பல இடங்களில் குழாய்கள் சரியாக பதிக்கப்படவில்லை. இணைப்புகள் வழங்கப்பட்ட கிராமங்களில் உள்ள மேல்நிலை நீர்த்தேக்கத் தொட்டிகளுடன் முறையாக இணைக்கப்படவில்லை. புதிதாக பொறுப்பேற்றுள்ள முதல்வர் விஜய் குடிநீர் பிரச்சினைக்கு முக்கியத்துவம் அளிப்பதாக தெரிவித்துள்ளார். எனவே, மாவட்ட ஆட்சியர் தலைமையிலான குழுவினர் ஆய்வு செய்து, தண்ணீர் விநியோகத்தில் உள்ள தடைகளை நீக்க வேண்டும். ஜல்ஜீவன் திட்டத்தில் முறைகேடு செய்தவர்கள் மீது கடும் நடவடிக்கை எடுக்க வேண்டும்' என வலியுறுத்தினார்.
ஊரக வளர்ச்சித்துறை அதிகாரிகள் கூறுகையில், 'ஜல்ஜீவன் திட்டப் பணிகள் முழுமையாக முடியவில்லை. நிதி ஒதுக்கீடு வராததால் ஒப்பந்ததாரர்களுக்கு பணம் வழங்க முடியவில்லை. இதனால் அவர்கள் பணியை தாமதப்படுத்துகின்றனர். இதன் காரணமாக, தற்போதுள்ள நடைமுறைகளின்படியே குடிநீர் விநியோகிக்கப்படுகிறது' என்று விளக்கமளித்தனர்.
