முள்ளங்கியை தினமும் உணவில் சேர்த்துக்கொள்வதால் ஏற்படும் வியக்கத்தக்க ஆரோக்கிய நன்மைகள் பற்றி தெரியுமா?
முள்ளங்கியில் ஆற்றல் மிக்க ஆன்டி ஆக்சிடண்ட்டுகள், வைட்டமின் சி மற்றும் ஏராளமான நார்ச்சத்துக்கள் நிறைந்துள்ளன. மேலும், பொட்டாசியம், ஃபோலேட், வைட்டமின் பி6, கால்சியம், மக்னீசியம், பாஸ்பரஸ், ஜிங்க், இரும்புச்சத்து போன்ற முக்கிய ஊட்டச்சத்துக்களும் இதில் அடங்கியுள்ளன. இது உடலில் ஆக்சிஜனேற்ற அழுத்தத்தைக் குறைத்து, ஒட்டுமொத்த ஆரோக்கியத்தை மேம்படுத்த உதவுகிறது.
முள்ளங்கியில் உள்ள குளுக்கோசினோலேட் என்னும் சேர்மம், கல்லீரலில் உள்ள நச்சுக்களை வேகமாக வெளியேற்றவும், நொதிகளின் செயல்பாட்டை மேம்படுத்தவும் உதவுகிறது. இதனால் கல்லீரலின் வடிகட்டும் திறன் அதிகரித்து, உடல் சோர்வு மற்றும் உள்ளுறுப்புகளில் ஏற்படும் அழுத்தங்கள் குறைகின்றன. ஆயுர்வேதத்தின்படி, முள்ளங்கி ரத்தத்தைச் சுத்திகரிக்கும் காய்கறியாகவும், வாத, பித்த, கப தோஷங்களை சமன்செய்யும் மருந்தாகவும் கருதப்படுகிறது. இது சீரான செரிமான மண்டல இயக்கத்திற்கும் வழிவகுக்கிறது.
கொழுப்பு கல்லீரல் பிரச்சனை உள்ளவர்களுக்கு முள்ளங்கி ஒரு சிறந்த உணவாகும். இது கல்லீரல் மற்றும் பித்தப்பையில் சுரக்கும் பித்தநீரின் அளவை சமநிலையில் வைத்திருக்க உதவுவதோடு, கல்லீரலில் உள்ள கொழுப்பைக் கரைக்கவும் பெரிதும் துணைபுரிகிறது.
முள்ளங்கியை பல வழிகளில் உணவில் சேர்த்துக்கொள்ளலாம். வாரத்தில் இரண்டு நாட்கள் சாம்பாரில் சேர்க்கலாம். கத்தரி போன்ற காய்கறிகளில் புளிக்குழம்பு செய்வது போல் முள்ளங்கியிலும் செய்யலாம். சாலட் ஆகவும், பருப்பு சேர்த்து கூட்டு ஆகவும் சாப்பிடலாம். மேலும், முள்ளங்கியை தோல் சீவி, துருவி அல்லது அரைத்து சாறெடுத்து, எலுமிச்சை சாறு கலந்து பருகலாம்.
