அமெரிக்க அதிபர் டொனால்டு டிரம்ப் தனது 3 நாள் சீனப் பயணத்தை முடித்துக்கொண்டு அமெரிக்கா திரும்பியுள்ளார். இந்த பயணத்தின்போது, சீன அதிபர் ஜி ஜின்பிங்குடன் நடைபெற்ற பேச்சுவார்த்தையில் இருநாட்டு உறவுகள், வர்த்தகம், சர்வதேச அரசியல் சூழல் உள்ளிட்ட பல்வேறு முக்கிய விஷயங்கள் விவாதிக்கப்பட்டன. மேலும், அமெரிக்க மற்றும் சீனத் தொழிலதிபர்களுக்கிடையேயான சந்திப்புகளும் நடைபெற்றன. இந்த பயணத்தின் விளைவாக, சீனா மற்றும் அமெரிக்கா இடையே பல முக்கிய வர்த்தக ஒப்பந்தங்கள் கையெழுத்தாகியுள்ளன.
தற்போது, அமெரிக்க அதிபரைத் தொடர்ந்து ரஷ்ய அதிபர் விளாடிமிர் புதினும் அடுத்த வாரம் இரண்டு நாட்கள் சீனாவிற்கு சுற்றுப்பயணம் மேற்கொள்ள உள்ளார் என்ற தகவல் வெளியாகியுள்ளது. இது சர்வதேச அரசியலில் பெரும் கவனத்தைப் பெற்றுள்ளது.
2001-ம் ஆண்டு கையெழுத்தான சீன-ரஷ்ய நட்புறவு ஒப்பந்தத்தின் 25-வது ஆண்டு நிறைவு விழாவை முன்னிட்டு, மே 19 மற்றும் 20 ஆகிய தேதிகளில் அதிபர் புதின் சீனாவிற்கு செல்ல திட்டமிட்டுள்ளதாக ரஷ்ய அதிபர் மாளிகை ஒரு அறிக்கையில் தெரிவித்துள்ளது. இந்த பயணம் இரு நாடுகளின் உறவில் ஒரு புதிய அத்தியாயத்தை தொடங்கும் என எதிர்பார்க்கப்படுகிறது.
இந்தப் பயணத்தின் போது, அதிபர் புதின் சீன அதிபர் ஜி ஜின்பிங்கை சந்தித்து விரிவாகப் பேசுவார். இருதரப்பு உறவுகள், சர்வதேச மற்றும் பிராந்தியப் பிரச்சினைகள், பொருளாதார ஒத்துழைப்பு உள்ளிட்ட பல்வேறு முக்கிய விஷயங்கள் குறித்து இரு தலைவர்களும் பேச்சுவார்த்தை நடத்த உள்ளனர். இந்த சந்திப்பு, உலக அரசியல் மற்றும் பொருளாதாரத்தில் தாக்கத்தை ஏற்படுத்தும் என எதிர்பார்க்கப்படுகிறது.
