ஆப்கானிஸ்தானுக்கு எதிரான 3வது ஒருநாள் போட்டியில் இந்திய வேகப்பந்து வீச்சாளர் பிரசித் கிருஷ்ணா 8.2 ஓவர்களில் 23 ரன்கள் மட்டுமே விட்டுக்கொடுத்து 5 விக்கெட்டுகளை வீழ்த்தி அசத்தியுள்ளார். இதன் மூலம், சேப்பாக்கம் மைதானத்தில் ஒருநாள் போட்டியில் 5 விக்கெட்டுகளைக் கைப்பற்றிய முதல் இந்திய பந்துவீச்சாளர் என்ற வரலாற்றுச் சாதனையை அவர் படைத்துள்ளார்.
கர்நாடகாவைச் சேர்ந்த 30 வயதான பிரசித் கிருஷ்ணா, அர்ஷ்தீப் சிங்கிற்குப் பதிலாக அணியில் சேர்க்கப்பட்டார். அவர் தனது முதல் பந்திலேயே ரஹ்மானுல்லா குர்பாஸை ஆட்டமிழக்கச் செய்து விக்கெட் வேட்டையைத் தொடங்கினார். தொடர்ந்து ரஹ்மத் ஷா (5), இப்ராஹிம் சத்ரான் (11), தர்விஷ் ரசூலி (1) மற்றும் சதம் அடித்த கேப்டன் ஹஷ்மத்துல்லா ஷாஹிதி (102) ஆகியோரின் விக்கெட்டுகளையும் வீழ்த்தினார். இந்த அபார பந்துவீச்சிற்காக அவருக்கு ஆட்டநாயகன் விருது வழங்கப்பட்டது.
இந்த ஆட்டத்தில் ஆப்கானிஸ்தான் அணியின் முதல் 5 பேட்டர்களையும் வீழ்த்தியதன் மூலம், ஒருநாள் போட்டி வரலாற்றில் இந்த அரிய சாதனையைச் செய்யும் 3-வது இந்திய பந்துவீச்சாளர் என்ற பெருமையை பிரசித் கிருஷ்ணா பெற்றுள்ளார். இவருக்கு முன்பு மனோஜ் பிரபாகர் மற்றும் முகமது ஷமி ஆகியோர் மட்டுமே இச்சாதனையை நிகழ்த்தியுள்ளனர். 1994ல் மனோஜ் பிரபாகர் இலங்கைக்கு எதிராகவும், 2023ல் முகமது ஷமி நியூசிலாந்துக்கு எதிராகவும் இந்த சாதனையை படைத்திருந்தனர். தற்போது பிரசித் கிருஷ்ணா இந்த பட்டியலில் இணைந்துள்ளார்.
சென்னை சேப்பாக்கம் மைதானத்தில் 1987 முதல் ஒருநாள் போட்டிகள் நடைபெற்று வந்தாலும், எந்த இந்திய பந்துவீச்சாளரும் 5 விக்கெட்டுகளை வீழ்த்தியதில்லை. 39 ஆண்டுகால காத்திருப்புக்கு முற்றுப்புள்ளி வைத்து, பிரசித் கிருஷ்ணா 8.2 ஓவர்களில் 23 ரன்களுக்கு 5 விக்கெட் என்ற சிறந்த பந்துவீச்சை பதிவு செய்துள்ளார். இதற்கு முன்பு அஜித் அகர்கரின் 4 விக்கெட்டுகள் சாதனையே சிறந்ததாக இருந்தது. மேலும், சேப்பாக்கம் மைதான வரலாற்றில் ஒட்டுமொட்டமாக 5 விக்கெட்டுகளை வீழ்த்திய மூன்றாவது பந்துவீச்சாளர் பிரசித் ஆவார். இதற்கு முன்பு பாகிஸ்தானின் ஆகிப் ஜாவேத் மற்றும் வெஸ்ட் இண்டீஸின் ரவி ராம்பால் ஆகியோர் இந்த சாதனையை படைத்துள்ளனர்.
ஆப்கானிஸ்தானுக்கு எதிராக ஒருநாள் போட்டியில் 5 விக்கெட்டுகளை வீழ்த்திய முதல் இந்திய பந்துவீச்சாளர் என்ற பெருமையையும் பிரசித் கிருஷ்ணா பெற்றுள்ளார். இப்பட்டியலில் ரவீந்திர ஜடேஜா, ஜஸ்பிரித் பும்ரா, முகமது ஷமி மற்றும் குர்னூர் பிரார் ஆகியோரும் ஆப்கானிஸ்தானுக்கு எதிராக சிறப்பாக பந்துவீசியுள்ளனர்.
