தமிழகத்தில் நிலவும் தொடர் மின்வெட்டுக்கு, புதிதாக பொறுப்பேற்றுள்ள அரசு உடனடியாக தீர்வு காண வேண்டும் என அதிமுக பொதுச்செயலாளர் எடப்பாடி பழனிசாமி வலியுறுத்தியுள்ளார். 'இப்போதுதான் ஆட்சிக்கு வந்திருக்கிறோம்' என்று சாக்குபோக்கு கூறாமல், மின்வெட்டைப் போக்க போர்க்கால அடிப்படையில் நடவடிக்கை எடுக்க வேண்டும் என்றும் அவர் கேட்டுக்கொண்டுள்ளார்.
கோடை காலம் தொடங்கியுள்ள நிலையில், தமிழகத்தில் மின் தேவை அதிகரிப்பது இயல்பு. பகல் நேரங்களில் வீட்டு உபயோகம் மற்றும் தொழிற்சாலைகளின் மின் பயன்பாடு அதிகரிக்கும். அதிமுக ஆட்சிக் காலங்களில், இந்த கூடுதல் தேவையை சமாளிக்க ஆண்டுதோறும் முன்கூட்டியே திட்டமிட்டு, முன்னெச்சரிக்கை நடவடிக்கைகள் எடுக்கப்பட்டன. 2011ல் ஜெயலலிதா ஆட்சிக்கு வந்தபோது, தமிழகம் தினமும் 10 மணி நேரத்திற்கும் மேலான மின்வெட்டை சந்தித்தது. ஆனால், சில ஆண்டுகளிலேயே அதை மாற்றி, அதிமுக ஆட்சியில் தமிழ்நாடு மின் மிகை மாநிலமாக திகழ்ந்தது.
அதிமுக ஆட்சியில், கோடைக்கால மின் தேவையை கருத்தில் கொண்டு காற்றாலை, சோலார் மற்றும் அனல் மின் நிலையங்களில் உற்பத்தியை அதிகரிக்கவும், மத்திய அரசு மற்றும் தனியார் நிறுவனங்களிடமிருந்து மின்சாரம் கொள்முதல் செய்யவும் நடவடிக்கை எடுக்கப்பட்டது. இதன் மூலம் மக்களுக்கு தடையில்லா மின்சாரம் உறுதி செய்யப்பட்டது. ஆனால், தற்போதைய அரசின் மேம்போக்கான மற்றும் உறுதியற்ற நடவடிக்கைகளால், தமிழகத்தின் பல்வேறு பகுதிகளில் கடும் மின் தட்டுப்பாடு ஏற்பட்டுள்ளது.
இரவு நேரங்களில் ஏற்படும் மின்வெட்டால் மக்கள் தூக்கமின்றி தவிக்கின்றனர். பகல் நேர மின்வெட்டு சமையல் உள்ளிட்ட அன்றாட பணிகளை பாதித்துள்ளது. இதனால் மக்களின் இயல்பு வாழ்க்கை பெரிதும் பாதிக்கப்பட்டுள்ளது. அறிவிக்கப்படாத மின்வெட்டை கண்டித்து, மக்கள் மின்சார அலுவலகங்களை முற்றுகையிடுவதாகவும், சாலை மறியலில் ஈடுபடுவதாகவும் செய்திகள் வருகின்றன. குறிப்பாக சென்னை தண்டையார்பட்டியில் இரண்டாவது நாளாக இரவு மின்சாரம் இல்லாததால் மக்கள் போராட்டத்தில் ஈடுபட்டனர். இந்த மின்வெட்டு சிறு, குறு மற்றும் நடுத்தர தொழிற்சாலைகளையும் பாதித்து, பொருளாதார ரீதியாகவும் பெரும் தாக்கத்தை ஏற்படுத்தியுள்ளது. எனவே, அரசு உடனடியாக நடவடிக்கை எடுக்க வேண்டும் என பழனிசாமி வலியுறுத்தியுள்ளார்.
