அதிமுகவில் பதவி ஆசை பிடித்தவர்களின் சுயநலச் செயல்களை முறியடிக்க அனைவரும் ஒன்றிணைய வேண்டும் என அக்கட்சியின் பொதுச்செயலாளர் எடப்பாடி பழனிசாமி அறைகூவல் விடுத்துள்ளார். 'எந்தத் தியாகத்தையும் செய்ய நான் தயாராக இருக்கிறேன்' என்று அவர் உருக்கமாகத் தெரிவித்துள்ளார்.
அதிமுகவின் பொன்விழா கண்ட இயக்கத்தின் வரலாறு, 31 ஆண்டுகால பொற்கால ஆட்சி, தமிழகத்தை முதன்மை மாநிலமாக உயர்த்திய பெருமை ஆகியவற்றை அவர் தனது அறிக்கையில் சுட்டிக்காட்டியுள்ளார். 2026 சட்டமன்றத் தேர்தலில் அதிமுக தலைமையிலான கூட்டணி 53 இடங்களில் வெற்றி பெற்றதையும், இதில் அதிமுக 47 தொகுதிகளிலும், கூட்டணிக் கட்சிகள் 6 இடங்களிலும் வெற்றி பெற்றதையும் அவர் நினைவு கூர்ந்தார். தமிழக மக்கள் அதிமுக ஆட்சி அமைய வாக்களித்த போதிலும், வெற்றி பெற்ற சில முன்னாள் அமைச்சர்கள் மற்றும் சட்டமன்ற உறுப்பினர்கள், அமைச்சர் மற்றும் வாரியத் தலைவர் பதவிகளை பேராசையுடன் பெற்று, ஆளும் கட்சியின் நம்பிக்கை வாக்கெடுப்பில் கொறடாவின் உத்தரவை மீறி, ஆதரவாக வாக்களித்தது கட்சிக்கு மாபெரும் துரோகம் இழைத்ததாக அவர் கடுமையாக சாடியுள்ளார்.
கடந்த காலங்களில் கட்சி சவால்களை சந்தித்த போதும், தலைவர்கள் விலகிச் சென்ற போதும், தொண்டர்களின் ஆதரவால் அதிமுக மீண்டு வந்ததை அவர் நினைவுகூர்ந்தார். 1980 நாடாளுமன்றத் தேர்தல், 1996 சட்டமன்றத் தேர்தல் ஆகியவற்றில் கட்சி பெற்ற வெற்றி மற்றும் அப்போது சில முக்கிய தலைவர்கள் விலகிச் சென்றதையும் அவர் குறிப்பிட்டார். ஜெயலலிதா மறைவுக்குப் பிறகு 2021 சட்டமன்றத் தேர்தலில் 75 இடங்களிலும், தற்போது 53 இடங்களிலும் வெற்றி பெற்றதைச் சுட்டிக்காட்டி, வெற்றியும் தோல்வியும் அரசியலில் இயல்பு என்றார்.
தற்போது, அமைச்சர் மற்றும் வாரியத் தலைவர் பதவிகளுக்காக சுயநலத்துடன் ஆளும் கட்சிக்கு ஆதரவு அளித்த சில முன்னாள் அமைச்சர்களின் செயல்களால் தொண்டர்களிடையே பெரும் கொந்தளிப்பு ஏற்பட்டுள்ளதாக அவர் குறிப்பிட்டுள்ளார். கட்சிக்கு துரோகம் இழைத்தவர்கள், தன் மீது அவதூறுகளை பரப்புவதாகவும், தான் ஏசி அறையில் அமர்ந்து அரசியல் செய்வதாக கூறுவது உண்மைக்கு புறம்பானது என்றும் அவர் மறுத்துள்ளார். 2021 முதல் கட்சியை கட்டிக் காக்க தான் சந்தித்த போராட்டங்களையும், அதிமுக ஆட்சிக்கட்டிலில் அமர வேண்டும் என்ற தனது உன்னத நோக்கத்தையும் தொண்டர்களும் மக்களும் அறிவார்கள் என்றும் அவர் கூறியுள்ளார். முதலமைச்சராகவும், எதிர்க்கட்சித் தலைவராகவும் இருந்தபோது அனைவரையும் சந்தித்ததாகவும், கடந்த ஆண்டு முதல் 196 சட்டமன்றத் தொகுதிகளில் எழுச்சிப் பயணம் மேற்கொண்டு கட்சியை வலுப்படுத்தியதையும் அவர் சுட்டிக்காட்டினார்.
தங்களது பதவி ஆசைக்காக கட்சிக்கு துரோகம் இழைத்தவர்கள் தன்னை பற்றி அவதூறு பரப்புவது வேதனைக்குரியது என்றும், சுயநலத்துடன் செயல்படும் முன்னாள் அமைச்சர்களிடம் தொண்டர்கள் எச்சரிக்கையுடன் இருக்க வேண்டும் என்றும் அவர் கேட்டுக்கொண்டார். ஜெயலலிதாவின் நம்பிக்கையை மெய்ப்பிக்க எந்த தியாகத்தையும் செய்ய தயாராக இருப்பதாகவும், உணர்வுப்பூர்வமாக செயல்பட்டு மீண்டும் அதிமுகவின் நல்லாட்சியை அமைப்போம் என்றும் அவர் சூளுரைத்தார். அதிமுக மேலும் வலுப்பெற உறுதுணையாக இருக்க வேண்டும் என்று நிர்வாகிகளையும் தொண்டர்களையும் அவர் அன்புடன் கேட்டுக்கொண்டார்.
