தெலுங்கானா மாநிலம் நியூ டவுன் பகுதியில் நள்ளிரவில் அதிர்ச்சிகரமான சம்பவம் ஒன்று அரங்கேறியுள்ளது. ஆட்டோ ஒன்றில் இருந்து ஒரு பொருளை சிலர் சாலையில் தூக்கி வீசியுள்ளனர். அந்த ஆட்டோ மின்னல் வேகத்தில் அங்கிருந்து தப்பிச் சென்றுள்ளது. சற்று நேரத்தில், அந்தப் பகுதியிலிருந்து குழந்தையின் அழுகுரல் கேட்டது.
சாலையோரம் சென்ற சில இளைஞர்கள் குழந்தையின் அழுகுரலைக் கேட்டு அருகில் சென்று பார்த்தபோது, ஒரு குழந்தை சால்வை மற்றும் சிறு மெத்தையில் சுற்றி வீசப்பட்டிருப்பதைக் கண்டு அதிர்ச்சியடைந்தனர். உடனடியாக அவர்கள் காவல் நிலையத்திற்கு தகவல் தெரிவித்தனர். ஆட்டோவில் சென்றவர்கள்தான் குழந்தையை வீசிச் சென்றிருக்கலாம் என சந்தேகிக்கப்படுகிறது.
சம்பவ இடத்திற்கு விரைந்து வந்த காவல்துறையினர், மீட்கப்பட்ட குழந்தையை உடனடியாக அருகிலுள்ள மருத்துவமனைக்கு அனுப்பி வைத்தனர். அங்கு குழந்தையை பரிசோதித்த மருத்துவர்கள், குழந்தை ஆரோக்கியமாக இருப்பதாக உறுதிப்படுத்தினர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
காவல்துறையினர், கண்காணிப்பு கேமரா பதிவுகளை ஆய்வு செய்து, குழந்தையை வீசிச் சென்ற மர்ம நபர்களைத் தீவிரமாகத் தேடி வருகின்றனர். இந்தச் சம்பவம் தொடர்பாக விசாரணை நடைபெற்று வருகிறது.
இதற்கிடையே, மீட்கப்பட்ட குழந்தையைத் தாங்கள் வளர்த்துக் கொள்வதாகக் கூறி பலர் மருத்துவமனைக்கு வந்தனர். இதனால் அங்கு சிறிது நேரம் பரபரப்பு ஏற்பட்டது. இருப்பினும், குழந்தையை அவர்களிடம் ஒப்படைக்கும் அதிகாரம் தங்களுக்கு இல்லை என்றும், மாவட்ட குழந்தைகள் நல அலுவலகத்தைத் தொடர்புகொள்ளுமாறும் மருத்துவர்கள் அவர்களிடம் அறிவுறுத்தினர். இந்தச் சம்பவம் குறித்து மேலதிக விசாரணைகள் நடைபெற்று வருகின்றன.
