தமிழகத்தில் முதல்வர் விஜய் தலைமையிலான தவெக அரசு, தலைமைச் செயலகத்தை புதிய இடத்திற்கு மாற்றும் பணிகளில் தீவிரமாக ஈடுபட்டுள்ளது. தற்போது தலைமைச் செயலகமாக செயல்பட்டு வரும் புனித ஜார்ஜ் கோட்டை, ஒரு பாரம்பரிய சின்னமாகப் பாதுகாக்கப்படும் என்றும், அதற்குப் பதிலாக ரூ.1,200 கோடி மதிப்பீட்டில் புதிய தலைமைச் செயலகம் கட்டப்படும் என்றும் முதல்வர் விஜய் சமீபத்தில் சட்டசபையில் அறிவித்தார்.
புதிய தலைமைச் செயலகம் எங்கு அமையப்போகிறது என்ற பெரும் எதிர்பார்ப்பு நிலவி வந்த நிலையில், தற்போது அதற்கான இடம் இறுதிகட்டமாக தேர்வு செய்யப்பட்டுள்ளது. பட்டினப்பாக்கம் போர்ஷோர் எஸ்டேட் பகுதியில் சுமார் 25.16 ஏக்கர் பரப்பளவில் இந்த புதிய தலைமைச் செயலகத்தைக் கட்டுவதற்கு தமிழக வீட்டு வசதி வாரியமும், சென்னை மாநகராட்சியும் அனுமதி வழங்கியுள்ளன. இது குறித்த தகவல்கள் அரசு வட்டாரங்களில் இருந்து வெளியாகியுள்ளன.
வருவாய்த்துறைக்குச் சொந்தமான கூடுதல் நிலங்களையும் சேர்த்து, மொத்தம் 26.5 ஏக்கர் பரப்பளவில் இந்த பிரம்மாண்ட கட்டிடம் அமையவுள்ளது. இதற்கான அதிகாரப்பூர்வ அறிவிப்பை தமிழக அரசு விரைவில் வெளியிடும் என எதிர்பார்க்கப்படுகிறது. இந்த புதிய தலைமைச் செயலகம், சுமார் 20 லட்சம் சதுர அடி பரப்பளவில், 15 அடுக்குகளைக் கொண்டதாக கட்டப்பட உள்ளது.
ஒரு சதுர அடிக்கு ரூ.22,000 என்ற மதிப்பில், இதன் மொத்த கட்டுமானச் செலவு ரூ.2,047 கோடியாக மதிப்பிடப்பட்டுள்ளது. வீட்டு வசதி வாரியத்திற்குச் சொந்தமான இந்தப் பகுதியில் இருந்து, முக்கிய சாலையான சாந்தோம் சாலையை எளிதாக அணுக முடியும் என்பது குறிப்பிடத்தக்கது.
இது குறித்து அதிகாரிகள் வட்டாரங்களில் விசாரித்தபோது, 'புதிய தலைமைச் செயலகம் அமைப்பதற்காக தமிழக அரசு மூன்று இடங்களைப் பரிசீலனை செய்தது. அதில், பட்டினப்பாக்கம் போர்ஷோர் எஸ்டேட், கிண்டியில் உள்ள தேசிய ஆராய்ச்சி நிலையம், மற்றும் நந்தம்பாக்கத்தில் உள்ள பின்டெக் சிட்டி அருகே உள்ள இடம் ஆகியவை அடங்கும். இறுதியாக, 25 ஏக்கர் பரப்பளவு கொண்ட பட்டினப்பாக்கம் சிறந்த இடமாகத் தேர்வு செய்யப்பட்டுள்ளது,' என்று தெரிவித்தனர்.
தற்போது தேர்வு செய்யப்பட்டுள்ள இந்த இடம், வீட்டு வசதி வாரியத்திற்குச் சொந்தமானது. இது 1958 ஆம் ஆண்டு கையகப்படுத்தப்பட்டது. அதன் பிறகு, 1963 முதல் 1998 வரையிலான காலகட்டத்தில், சுமார் 1,380 அரசு ஊழியர்களுக்கான குடியிருப்புகள் இங்கு கட்டப்பட்டன. இந்த குடியிருப்புகள் தற்போது சிதிலமடைந்துள்ளதால், அவற்றை இடிக்கும் பணிகள் நடைபெற்று வருகின்றன. இந்தப் பணிகள் முடிந்த பிறகு, புதிய தலைமைச் செயலகத்திற்கான கட்டுமானப் பணிகள் தொடங்கும் என எதிர்பார்க்கப்படுகிறது.
