மனிதவள மேலாண்மைத் துறை அமைச்சர் டி.சரத்குமார் போதைப்பொருள் பயன்படுத்தியது போன்ற வீடியோ வெளியாகி சர்ச்சையை ஏற்படுத்தியதை கண்டித்து, திமுக மாணவர் அணி சார்பில் தமிழகம் முழுவதும் ஆர்ப்பாட்டங்கள் நடைபெற்றன. சென்னையில் நடைபெற்ற ஆர்ப்பாட்டத்தில் பங்கேற்ற அமைச்சர்கள் மற்றும் மேயர் பிரியா கைது செய்யப்பட்டனர். மாலை 7 மணி ஆகியும் கைது செய்யப்பட்டவர்களை விடுவிக்கவில்லை என்றும், முதல்வர் உத்தரவுக்காக போலீஸ் காத்திருப்பதாகவும் மேயர் பிரியா குற்றம் சாட்டியுள்ளார்.
போதைப்பொருள் ஒழிப்பு நாளன்று மனிதவள மேலாண்மைத் துறை அமைச்சர் டி.சரத்குமார் போதைப் பொருள் பயன்படுத்துவது போன்ற வீடியோ வெளியாகி பெரும் சர்ச்சையை கிளப்பியது. இந்த செயலைக் கண்டித்தும், அமைச்சர் டி.சரத்குமாரை உடனடியாகப் பதவி நீக்கம் செய்ய வலியுறுத்தியும், திமுக தலைவர் உத்தரவின் பேரில், திமுக மாணவர் அணி சார்பில் இன்று (29.6.2026) தமிழகம் முழுவதும் கழக மாவட்டத் தலைநகரங்களில் மாவட்ட – ஒன்றிய – நகர – பேரூர் கழக மாணவரணி நிர்வாகிகள் மற்றும் மாணவர்கள் என ஆயிரக்கணக்கானோர் ஆர்ப்பாட்டத்தில் ஈடுபட்டனர்.
சென்னையில் நடைபெற்ற ஆர்ப்பாட்டத்தில் பங்கேற்ற அமைச்சர்கள் மற்றும் மேயர் பிரியா கைது செய்யப்பட்டனர். இது குறித்து செய்தியாளர்களிடம் பேசிய மேயர் பிரியா, 'அமைச்சர் சரத்குமார் மீது நடவடிக்கை எடுக்க காலையில் இருந்து திமுக போராட்டம் நடத்தியும் அரசு எந்த முடிவையும் தெரிவிக்கவில்லை. த.வெ.க அரசை கண்டித்து திமுக மாணவர் அணி நடத்த முயன்ற போராட்டத்தைத் தடுத்து, கைது செய்யப்பட்டவர்களை மாலை 7 மணிக்கு மேல் ஆகியும் இன்னும் விடுவிக்கவில்லை. தனியார் மண்டபங்களில் அடைக்கப்பட்டுள்ள பெண்களுக்குக் கழிவறை உள்ளிட்ட அடிப்படை வசதிகள் கூட இல்லை. முதலமைச்சரிடம் இருந்து உத்தரவு வரவில்லை எனக் கூறி காவல்துறை காலதாமதப்படுத்திக் கொண்டிருக்கிறது. ஆர்ப்பாட்டத்திற்கு காவல்துறை அனுமதி வழங்கவில்லை. அமைச்சருக்கு எதிராக தாங்கள் போராட்டம் நடத்தியும் அரசு அதை கண்டுகொள்ளவில்லை' என்று தெரிவித்தார்.
கைது செய்யப்பட்டவர்களை விடுவிக்க காவல்துறை தாமதிப்பது குறித்தும், அடிப்படை வசதிகள் மறுக்கப்படுவது குறித்தும் மேயர் பிரியா தனது அதிருப்தியை வெளிப்படுத்தினார். அமைச்சரின் செயலைக் கண்டித்து நடத்தப்பட்ட போராட்டம் அரசு கவனத்தைப் பெறவில்லை என்றும் அவர் கூறினார். இந்த விவகாரம் தமிழக அரசியலில் மேலும் பரபரப்பை ஏற்படுத்தியுள்ளது.
