நடிகை கீர்த்தி சுரேஷ், கடந்த 2024-ல் வெளியான 'பேபி ஜான்' படத்தின் மூலம் பாலிவுட்டில் அறிமுகமானார். இந்தப் படம் 'தெறி' படத்தின் ரீமேக் ஆகும். அட்லி தயாரித்த இந்தப் படத்திற்கு பெரிய வரவேற்பு கிடைக்கவில்லை.
தற்போது, கீர்த்தி சுரேஷ் விஜய் தேவரகொண்டாவுடன் 'ரவுடி ஜனார்தனா' படத்தில் நடித்து வருகிறார். இதற்கிடையில், அவர் நடித்துள்ள மற்றொரு இந்திப் படத்திற்கு 'ரஃப்தார்' என பெயரிடப்பட்டுள்ளது. இந்தப் படத்தில் அனுராக் தாக்கூர், ரோஹன் வர்மா, தான்யா மணிக்தலா, ரஜத் கபூர் உள்ளிட்டோர் முக்கிய வேடங்களில் நடித்துள்ளனர். ராஜ்குமார் ராவ் இப்படத்தில் ஹீரோவாக நடித்துள்ளார்.
அமேசான் எம்ஜிஎம் ஸ்டுடியோஸ் வழங்கும் இந்தப் படத்தை ஆதித்யா நிம்பால்கர் இயக்கியுள்ளார். ராஜ்குமார் ராவின் மனைவியும் நடிகையுமான பத்ரலேகா, தனது காம்பா பிலிம் மூலம் இப்படத்தைத் தயாரித்துள்ளார். வேகமாக வளரும் ஒரு ஸ்டார்ட்-அப் நிறுவனத்தையும், லட்சிய வெறி கொண்ட ஒரு ஆணுக்குப் பெண்ணுக்கும் இடையிலான உறவையும் மையப்படுத்திய கதை இது. பணம், அதிகாரம், பேராசை ஆகியவை பெருகும்போது, வெற்றி பெற வேண்டும் என்ற அவர்களின் தாகம் காதலோடு மோதத் தொடங்குகிறது. இந்தியாவின் வணிகக் கல்வி முறையை நையாண்டியாகவும், அறிவு விதைக்க வேண்டிய கல்வி எப்படி வணிகமயமானது என்பதையும் இப்படம் பேசும் என படக்குழு தெரிவித்துள்ளது.
இந்நிலையில், ஜூலை 24-ம் தேதி வெளியாகவிருந்த 'ரஃப்தார்' திரைப்படம், அக்டோபர் 16-ம் தேதிக்கு ஒத்திவைக்கப்பட்டுள்ளது.
