ஐபிஎல் 2026 சீசனின் முக்கியப் போட்டியில், ராயல் சேலஞ்சர்ஸ் பெங்களூரு (ஆர்சிபி) அணிக்கு எதிராக கொல்கத்தா நைட் ரைடர்ஸ் (கேகேஆர்) அணி முதலில் பேட்டிங் செய்தது. டாஸ் வென்ற பெங்களூரு கேப்டன் ரஜத் படிதார், கொல்கத்தா அணியை முதலில் பேட்டிங் செய்ய அழைத்தார். இது ஆர்சிபி அணிக்கு பெரும் ஏமாற்றத்தை அளித்தது. அங்கிரிஷ் ரகுவன்ஷி மற்றும் ரிங்கு சிங் ஆகியோரின் அதிரடியான ஆட்டத்தால், கொல்கத்தா அணி 20 ஓவர்களில் 192 ரன்கள் என்ற வலுவான ஸ்கோரை எட்டியது.
மழையால் சற்று தாமதமாகத் தொடங்கிய இந்த ஆட்டத்தில், கொல்கத்தா அணிக்கு தொடக்க வீரர்களாக கேப்டன் அஜிங்க்யா ரஹானே மற்றும் பின் ஆலன் களமிறங்கினர். பின் ஆலன் 8 பந்துகளில் 18 ரன்கள் எடுத்து அதிரடி காட்டினாலும், புவனேஸ்வர் குமார் பந்துவீச்சில் ஆட்டமிழந்தார். அவரைத் தொடர்ந்து கேப்டன் ரஹானேவும் 19 ரன்களில் ஜோஷ் ஹேசில்வுட் பந்துவீச்சில் கேட்ச் ஆகி வெளியேறினார். இதனால், பவர் பிளே ஓவர்களில் கொல்கத்தா அணி 48 ரன்களுக்கு 2 விக்கெட்டுகளை இழந்து தடுமாறியது.
இதனையடுத்து, விக்கெட் கீப்பர் அங்கிரிஷ் ரகுவன்ஷி மற்றும் கேமரூன் கிரீன் ஆகியோர் இணைந்து அணியை சரிவிலிருந்து மீட்டனர். பெங்களூரு பந்துவீச்சை நேர்த்தியாக எதிர்கொண்ட இந்த ஜோடி, 68 ரன்கள் சேர்த்தது. கேமரூன் கிரீன் 24 பந்துகளில் 32 ரன்கள் எடுத்த நிலையில் ரசிக் சலாம் பந்துவீச்சில் ஆட்டமிழந்தார். மறுமுனையில், ரகுவன்ஷி பெங்களூரு பந்துவீச்சை நாலாபுறமும் சிதறடித்து அபாரமாக அரைசதம் கடந்தார். கடைசி கட்டத்தில், அதிரடி மன்னன் ரிங்கு சிங் களமிறங்கி தனது வழக்கமான ஆட்டத்தை வெளிப்படுத்தினார்.
பந்துகள் சிக்சர்களுக்கும் பவுண்டரிகளுக்கும் பறந்தன. இவர்களின் அதிரடியால் ஸ்கோர் ஜெட் வேகத்தில் உயர்ந்தது. 46 பந்துகளில் 7 பவுண்டரிகள், 3 சிக்சர்களுடன் 71 ரன்கள் குவித்த ரகுவன்ஷி, ஆட்டத்தின் கடைசி பந்தில் ரன் அவுட் ஆனார். மறுபுறம், ரிங்கு சிங் 29 பந்துகளில் 3 பவுண்டரிகள், 2 சிக்சர்களுடன் 49 ரன்கள் குவித்து இறுதிவரை ஆட்டமிழக்காமல் களத்தில் இருந்தார். இறுதியில், கொல்கத்தா அணி 4 விக்கெட்டுகளை இழந்து 192 ரன்கள் குவித்தது. ஆர்சிபி பந்துவீச்சில் புவனேஸ்வர் குமார், ஹேசில்வுட், ரசிக் சலாம் தலா ஒரு விக்கெட் வீழ்த்தினர். ஜேக்கப் டஃபி மற்றும் குருணால் பாண்டியா விக்கெட் ஏதுமின்றி அதிக ரன்களை வாரி வழங்கினர்.
