ஆப்கானிஸ்தானுக்கு எதிரான முதல் ஒருநாள் போட்டிக்குப் பிறகு நடைபெற்ற செய்தியாளர் சந்திப்பின் போது, இந்திய அணியின் ஆல்-ரவுண்டர் நிதிஷ் குமார் ரெட்டி தனது தாயிடமிருந்து வந்த அழைப்பிற்கு பதிலளிப்பதற்காக செய்தியாளர் சந்திப்பை சிறிது நேரம் நிறுத்தி நெகிழ்ச்சியை ஏற்படுத்தியுள்ளார்.
தர்மசாலாவில் உள்ள ஹெச்பிசிஏ மைதானத்தில் சனிக்கிழமை (ஜூன் 13) நடைபெற்ற இப்போட்டியில் இந்திய அணி 7 விக்கெட் வித்தியாசத்தில் வெற்றி பெற்று, மூன்று போட்டிகள் கொண்ட இந்த தொடரில் முன்னிலை பெற்றுள்ளது. ஹர்திக் பாண்டியா இல்லாத நிலையில், இந்த தொடரில் முக்கிய பங்காற்ற வேண்டிய பொறுப்பில் இருக்கும் இளம் வீரரான நிதிஷ் குமார் ரெட்டி, மழையால் பாதிக்கப்பட்ட இப்போட்டியில் பந்துவீச்சில் சிறப்பான பங்களிப்பை வழங்கினார். அவர் 4 ஓவர்களில் 31 ரன்கள் கொடுத்து 2 விக்கெட்டுகளை வீழ்த்தினார். இதில் சதம் அடித்த ரஹ்மானுல்லா குர்பாஸ் மற்றும் மூத்த வீரர் முகமது நபி ஆகியோரின் விக்கெட்டுகள் அடங்கும்.
செய்தியாளர் ஒருவர் கேள்வி எழுப்பிக் கொண்டிருந்த போது, நிதிஷ் குமார் ரெட்டியின் மொபைல் போன் ஒலித்தது. உடனே அவர் புன்னகையுடன், 'மன்னிக்கவும், ஒரு விநாடி. நான் இந்த அழைப்பை ஏற்க வேண்டும்' என்று கூறிவிட்டு, பின்னர் விரைவில் திரும்ப அழைப்பதாக தனது தாயிடம் தெரிவித்துவிட்டு போனை வைத்தார். ஹர்திக் பாண்டியாவின் காயம் காரணமாக, ஒருநாள் போட்டிகளுக்கான இந்திய அணியில் நிதிஷ் குமார் ரெட்டிக்கு முக்கிய பங்கு அளிக்கப்பட்டுள்ளது. மேலும், அயர்லாந்து மற்றும் இங்கிலாந்துக்கு எதிரான வரவிருக்கும் டி20 தொடர்களுக்கான இந்திய அணியிலும் இந்த இளம் ஆல்-ரவுண்டர் தேர்வு செய்யப்பட்டுள்ளார்.
தனது ஒருநாள் கிரிக்கெட் வாழ்க்கையின் தொடக்கத்தில் விக்கெட் ஏதுமின்றி தடுமாறிய நிதிஷ் குமார் ரெட்டிக்கு, தர்மசாலா போட்டி ஒரு திருப்புமுனையாக அமைந்தது. அறிமுகப் போட்டிக்கு பிறகு விளையாடிய 4 போட்டிகளிலும் விக்கெட் எதுவும் வீழ்த்தாத அவர், ஆட்டத்தின் 16-வது ஓவரில் ரஹ்மானுல்லா குர்பாஸின் விக்கெட்டை வீழ்த்தி தனது முதல் சர்வதேச ஒருநாள் விக்கெட்டைப் பதிவு செய்தார். ஐபிஎல் 2026 தொடரில் சன்ரைசர்ஸ் ஹைதராபாத் (SRH) அணிக்காக விளையாடிய போது, தனது பந்துவீச்சு முறை மற்றும் நுட்பத்தை மேம்படுத்திக் கொண்ட அவர், வேகம் மற்றும் பந்து வீச்சின் கட்டுப்பாட்டில் நல்ல முன்னேற்றத்தைக் காட்டினார். தொடரை வெல்லும் முனைப்பில் உள்ள இந்திய அணி, ஆப்கானிஸ்தானுக்கு எதிரான இரண்டாவது ஒருநாள் போட்டியில் அடுத்து விளையாடவுள்ளது. இப்போட்டி லக்னோவில் உள்ள ஏகானா மைதானத்தில் வரும் புதன்கிழமை (ஜூன் 17) நடைபெற திட்டமிடப்பட்டுள்ளது.
