சமையலறையில் பயன்படுத்தப்படும் அடுப்புகள் குறித்த விவாதம் தொடர்ந்து நடைபெற்று வருகிறது. குறிப்பாக, ஆஸ்துமா நோயால் பாதிக்கப்பட்டவர்கள் கேஸ் அடுப்புகளுக்குப் பதிலாக மின்சார அடுப்புகளைப் பயன்படுத்தியதன் மூலம் சுவாசப் பிரச்சனைகளில் முன்னேற்றம் கண்டுள்ளதாக ஒரு ஆய்வு தெரிவிக்கின்றது.
வடகிழக்கு ஓஹியோவில் உள்ள 'மெட்ரோஹெல்த் சிஸ்டம்' மருத்துவமனை, ஆறு சமூக அமைப்புகளுடன் இணைந்து நடத்திய இந்த ஆய்வில், முறையான கட்டுப்பாடு இல்லாத ஆஸ்துமா பாதிப்புக்குள்ளான 85 பெரியவர்கள் மற்றும் குழந்தைகள் பங்கேற்றனர். அவர்களின் ஆஸ்துமா அறிகுறிகள், அவசரகால மருந்துகளின் பயன்பாடு, அன்றாட செயல்பாடுகளில் இருந்த கட்டுப்பாடுகள் ஆகியவை கண்காணிக்கப்பட்டன.
ஆய்வில் பங்கேற்றவர்கள், தங்களது கேஸ் அடுப்புகளுக்குப் பதிலாக மின்சார இண்டக்ஷன் அடுப்புகளைப் பயன்படுத்துவதற்கு 1 முதல் 4 வாரங்களுக்கு முன்பும், மாற்றிய பின் 2 முதல் 3 மாதங்களுக்குப் பின்பும் தங்களது உடல்நலத் தகவல்களைப் பதிவு செய்தனர். 'இண்டக்ஷன் அடுப்புகள் விரைவாக வெப்பமடைவதோடு, குளிரடையவும் செய்யும். சாதாரண காயில் கொண்ட மின்சார அடுப்புகளை விட இவை பாதுகாப்பானவை மற்றும் சுத்தம் செய்ய எளிதானவை' என செகல் தனது கட்டுரையில் குறிப்பிட்டுள்ளார்.
இண்டக்ஷன் அடுப்புகள் மின்சாரத்தால் இயங்கினாலும், அவை சமையல் பாத்திரங்களை வெப்பப்படுத்த மின்காந்தப் புலத்தைப் பயன்படுத்துகின்றன. சாதாரண மின்சார அடுப்புகள் நேரடியாக மின்சாரத்தையே நம்பி வெப்பத்தை உருவாக்குகின்றன. இந்த ஆய்வுக்காக, காற்றுத் தரக் கண்காணிப்பான்கள் மூலம், அடுப்புகள் மாற்றப்படுவதற்கு முன்பும் பின்பும் காற்றில் உள்ள நைட்ரஜன் டை ஆக்சைடு அளவு அளவிடப்பட்டது.
எரிவாயு அடுப்புகளிலிருந்து வெளியேறும் நைட்ரஜன் டை ஆக்சைடு நுரையீரலைப் பாதிக்கும். கேஸ் அடுப்பிலிருந்து மின்சார அடுப்பிற்கு மாறிய பிறகு, வீடுகளுக்குள் இருந்த நைட்ரஜன் டை ஆக்சைடின் அளவு 70% குறைந்துள்ளது. செகலின் கூற்றுப்படி, ஆய்வில் பங்கேற்றவர்களின் ஆஸ்துமா அறிகுறிகள் 'மிதமான' நிலையிலிருந்து 'லேசான' நிலைக்குக் குறைந்துள்ளன. இது ஆஸ்துமா மருந்துகளின் மருத்துவப் பரிசோதனைகளில் பதிவான முன்னேற்றங்களுக்கு இணையாக அல்லது அதைவிட அதிகமாகும்.
மேலும், வேலை அல்லது பள்ளிக்குச் செல்ல முடியாத நாட்களின் எண்ணிக்கை சுமார் 80% குறைந்துள்ளது. அவசரச் சிகிச்சை பிரிவு வருகைகளும், மருத்துவமனையில் அனுமதிக்கப்படுவதும் 70% குறைந்துள்ளன. ஆஸ்துமா முன்னேற்றத்தைத் தவிர, 98% பங்கேற்பாளர்கள் தங்களது புதிய மின்சார இண்டக்ஷன் அடுப்புகள் குறித்து திருப்தி தெரிவித்துள்ளனர். முந்தைய கேஸ் அடுப்புகள் குறித்து 41% பேர் மட்டுமே திருப்தி தெரிவித்திருந்தனர்.
எரிவாயு அடுப்பிலிருந்து மின்சார அடுப்பிற்கு மாறுவது ஆஸ்துமாவை முழுமையாகக் குணப்படுத்தாது என்றும், மருத்துவப் பராமரிப்புக்கு இது மாற்றாக அமையாது என்றும் செகல் தனது கட்டுரையில் தெளிவுபடுத்தியுள்ளார். மேலும், அடுப்பை மாற்றுவது பலருக்குப் பொருளாதார ரீதியாகச் சாத்தியமில்லாததாகவும் இருக்கலாம்.
எரிவாயு அடுப்புகள் வீட்டு உபயோகக் காற்று மாசுபாட்டிற்கு முக்கியக் காரணமாகும். அவை நைட்ரஜன் டை ஆக்சைடு, கார்பன் மோனாக்ஸைடு, பென்சீன், ஃபார்மால்டிஹைட் போன்ற வாயு மாசுபாடுகளை வெளியிடுகின்றன. இருப்பினும், கேஸ் அடுப்பின் மாசு அளவுகள் வீட்டிற்கு வீடு மாறுபடலாம். உங்கள் வாழ்க்கை முறை, ஆரோக்கியம், வயது மற்றும் தற்போதைய மருத்துவ நிலைமைகளும் சுகாதார விளைவுகளைத் தீர்மானிக்கலாம்.
கேஸ் அடுப்பிலிருந்து மின்சார அடுப்பிற்கு மாற முடியாதவர்கள், சமையல் செய்யும்போது காற்று மாசுபாட்டைக் குறைக்க சில நடவடிக்கைகளை எடுக்கலாம். ஜன்னல்களைத் திறந்து வைப்பதன் மூலமும், சமையலறை சிம்னியின் எக்ஸாஸ்ட் விசிறியைப் பயன்படுத்துவதன் மூலமும் காற்றோட்டத்தை அதிகரிக்கலாம். சாத்தியமில்லை எனில், ஒரு ஏர் பியூரிஃபையரை வாங்குவதைக் கவனியுங்கள். இது சமையல் துகள்களையும் சில வாயுக்களையும் வடிகட்ட உதவும். உங்கள் ஏர் பியூரிஃபையரின் ஃபில்டரைத் தவறாமல் மாற்றுவதை உறுதிப்படுத்திக் கொள்ளுங்கள். எரிவாயு அடுப்பை மின்சார அடுப்பாக மாற்றுவது வீட்டு உபயோகக் காற்று மாசுபாட்டைக் குறைக்கும் என்றாலும், இது மட்டுமே முழுமையான தீர்வல்ல.
