சினிமாவில் நடித்து வந்த முதல்வர் விஜய், நிஜ வாழ்விலும் நடிப்பதாக அதிமுக பொதுச்செயலாளர் எடப்பாடி பழனிசாமி விமர்சித்துள்ளார். மதுராந்தகம் தொகுதியில் அதிமுக வேட்பாளருக்கு ஆதரவாக வாக்கு சேகரித்த அவர், முதல்வர் விஜய்யின் செயல்பாடுகள் குறித்து பல்வேறு கேள்விகளை எழுப்பினார்.
"முதல்வர் வெள்ளிக்கிழமை மாலை வீடு திரும்பினால், திங்கட்கிழமை காலைதான் பணிக்கு வருகிறார். கரூரில் 41 பேர் இறந்தபோது ஓடி ஒளிந்து சென்னையில் போய் அமர்ந்துகொண்டார் முதல்வர் விஜய். கரூர் சம்பவம் நடந்து 72 நாட்கள் ஆகியும் வீட்டை விட்டு வெளியே வராதவர் எப்படி நாட்டு மக்களைக் காப்பாற்றுவார்?" என்று எடப்பாடி பழனிசாமி கேள்வி எழுப்பினார்.
மேலும், "உல்லாசப் பயணத்திற்காக வெளிநாடு சென்றது ஏன்?" என்றும் அவர் மறைமுகமாக முதல்வர் விஜய்யைக் குறிப்பிட்டார். மதுராந்தகம் தொகுதியில் தவெக வேட்பாளர் டெபாசிட் இழக்க வேண்டும் என்றும், குதிரை பேரத்தில் விலை போய்விட்டதால் மதுராந்தகத்தில் இடைத்தேர்தல் திணிக்கப்பட்டுள்ளதாகவும் அவர் குற்றம் சாட்டினார்.
"ஓட்டுப்போட்ட மக்களை மறந்து தவெகவில் சேர்ந்தவர்களுக்கு பாடம் புகட்ட வேண்டும். அதிமுகவில் வெற்றி பெற்றவர்களை ராஜினாமா செய்ய வைத்து தவெகவில் சேர்த்தது வெட்கக்கேடு. 2 ஆண்டுகள் அதிமுகவிற்காக பாடுபட்டுக் கொண்டிருக்கிறேன். எங்கள் அனுபவம் அளவிற்குகூட உங்கள் வயசில்லை. அடக்கி வாசிங்க தம்பி" என்று அவர் கூறினார்.
"வெற்றி – தோல்வி பற்றி அதிமுக கவலைப்படாது. மக்களைப் பற்றி தான் கவலைப்படுவோம். எங்களைப் பார்த்தா, தூர்ந்து போன கட்சின்றீங்க. அதிமுக-வில் இருந்து விலைக்கு வாங்கி வேட்பாளரை நிறுத்திவிட்டு இன்றைக்கு என்னென்னவோ பேசுகிறார்களே… இந்த ஜாம்பவான்கள் எல்லாம் கரூர் சம்பவம் நடந்தபோது எங்கே போனீர்கள்? ரீல்ஸும், ரீலும்தான் தவெகவின் மூலதனம். தவெக நெல்லிக்காய் மூட்டை போன்றது; சிதறிப் போய்விடும்" என்றும் எடப்பாடி பழனிசாமி விமர்சித்தார்.
கரூர் வழக்கு இன்னும் முழுமை பெறவில்லை என்றும், அந்த வழக்கு முழுமை பெறும்போது தீர்ப்பு எப்படி இருக்கும் என்று தனக்குத் தெரியாது என்றும், ஆனால் அந்த தீர்ப்புக்குப் பிறகுதான் அந்தக் கட்சி தமிழகத்தில் இருக்குமா, இல்லையா என்பது முடிவாகும் என்றும் அவர் தெரிவித்தார்.
