சமீபத்தில் போபால், நொய்டா ஆகிய நகரங்களில் அடுத்தடுத்து நடந்த சோக சம்பவங்கள், இந்தியாவில் வரதட்சணை கொடுமைகள் இன்னும் தீரவில்லை என்பதை நம் கண்முன்னே நிறுத்தியுள்ளன. இவை வெறும் தனிப்பட்ட நிகழ்வுகள் அல்ல, மாறாக பல ஆண்டுகளாக தொடரும் ஒரு சமூக அவலத்தின் வெளிப்பாடு என தேசிய குற்ற ஆவணக் காப்பகத்தின் (NCRB) புள்ளிவிவரங்கள் தெளிவாகக் காட்டுகின்றன.
2024 ஆம் ஆண்டில் மட்டும் இந்தியாவில் 5,737 வரதட்சணை மரணங்கள் பதிவாகியுள்ளன. முந்தைய ஆண்டுகளுடன் ஒப்பிடும்போது இது சற்று குறைந்திருந்தாலும், இந்தப் பிரச்சனையின் தீவிரத்தை உணர்த்த இந்த எண்ணிக்கை போதுமானதாக உள்ளது. கடந்த பத்தாண்டுகால தரவுகளைப் பார்க்கும்போது, வரதட்சணை மரணங்களின் எண்ணிக்கை படிப்படியாகக் குறைந்து வந்துள்ளது. 2015ல் 7,634 ஆக இருந்த மரணங்கள், 2024ல் 5,737 ஆகக் குறைந்துள்ளது. இந்த பத்தாண்டுகளில் சுமார் 1,900 மரணங்கள் குறைந்திருப்பது சற்றே ஆறுதல் அளித்தாலும், தற்போதைய புள்ளிவிவரங்களின்படி, நாட்டில் நாளொன்றுக்கு சராசரியாக 15க்கும் மேற்பட்ட பெண்கள் வரதட்சணைக் கொடுமையால் உயிரிழக்கின்றனர். அதாவது, ஒவ்வொரு 90 நிமிடத்திற்கும் ஒரு பெண் வரதட்சணை கொடுமையால் இறக்கிறார். இது சமூகத்தில் இந்த அவலம் இன்னும் தீவிரமாக நீடிக்கிறது என்பதையே காட்டுகிறது.
வரதட்சணை மரணங்கள் நாடு முழுவதும் ஒரே மாதிரியாகப் பதிவாகவில்லை. சில குறிப்பிட்ட மாநிலங்களில் மட்டுமே இந்த எண்ணிக்கை மிக அதிகமாக உள்ளது. குறிப்பாக, உத்தர பிரதேசத்தில் மட்டும் 2024ல் 2,038 மரணங்கள் பதிவாகியுள்ளன. இது நாட்டின் மொத்த வரதட்சணை மரணங்களில் மூன்றில் ஒரு பங்கிற்கும் அதிகமாகும். அடுத்தபடியாக, பீகாரில் 1,078 மரணங்களும், மத்தியப் பிரதேசத்தில் 450 மரணங்களும் பதிவாகியுள்ளன. ராஜஸ்தான் (386), மேற்கு வங்கம் (337) ஆகிய மாநிலங்களும் இந்தப் பட்டியலில் முன்னிலையில் உள்ளன. குறிப்பிட்ட சில மாநிலங்களில் மட்டும் இந்த வழக்குகள் குவிந்திருப்பது, அங்கு வரதட்சணை கொடுமை என்பது சமூகத்தில் இன்னும் ஆழமாக வேரூன்றியுள்ளது என்பதைக் காட்டுகிறது.
வரதட்சணை கொடுமையால் ஏற்படும் மரணங்களில், மன உளைச்சல் மற்றும் சித்திரவதையால் நிகழும் தற்கொலைகள், பிற சந்தேகத்திற்கிடமான மரணங்கள் ஆகியவை அடங்கும். அதே சமயம், வரதட்சணைக் கொலைகள் எனப்படும் நேரடி வன்முறை மரணங்களையும் NCRB தரவுகள் வகைப்படுத்தியுள்ளன. அதன்படி, 2024ல் மேற்கு வங்கத்தில் 163 கொலைகளும், ஒடிசாவில் 161 கொலைகளும் நிகழ்ந்துள்ளன. ராஜஸ்தானில் 75, பீகாரில் 66 மற்றும் உத்தர பிரதேசத்தில் 58 சம்பவங்கள் பதிவாகியுள்ளன. வரதட்சணை தகராறுகள் ஒரு பெண்ணின் நேரடிப் படுகொலையில் எவ்வாறு முடிகின்றன என்பதற்கு இந்த எண்களே சாட்சியாக உள்ளன.
