தமிழ்நாட்டை ஆளும் தவெக அரசு, பொறுப்பற்றதாகவும், ஈவிரக்கமற்றதாகவும் இருப்பதாக திமுகவின் தகவல் தொழில்நுட்பப் பிரிவு கடுமையாக விமர்சித்துள்ளது. மாநிலம் முழுவதும் நிலவும் மின்வெட்டு, கொலைகள், பாலியல் அத்துமீறல்கள், தண்ணீர் பற்றாக்குறை மற்றும் விவசாயிகள் போராட்டம் போன்ற பிரச்சனைகளுக்கு மத்தியில், முதலமைச்சர் விஜய் லண்டனில் சொகுசுப் பயணம் மேற்கொண்டுள்ளதாக திமுக குற்றம்சாட்டியுள்ளது. இதுகுறித்து திமுக ஐடி விங் தனது எக்ஸ் தளத்தில் பதிவிட்டதாவது:
'மாநிலம் முழுதும் மின்வெட்டு, படுகொலைகள், பாலியல் அத்துமீறல்கள், தண்ணீர் பற்றாக்குறை, விவசாயிகள் போராட்டம் என மக்கள் வீதியில் இறங்கி 'தவெக ஆட்சி ஒழிக' எனப் போராடும்போது, தமிழ்நாட்டை ஆளத் துப்பில்லாத 'டம்மி' முதல்-அமைச்சர் தம்பி விஜய், மக்களின் வரிப்பணத்தில் லண்டனுக்குச் சொகுசுப் பயணம் சென்று, நண்பர்களுடன் கார் ரேஸ் பார்த்து மகிழ்ந்துள்ளார். இது ஊரான் வீட்டு நெய்யில் ஸ்வீட் சாப்பிடுவது போன்ற செயல்' என திமுக விமர்சித்துள்ளது.
மேலும், மின்சாரத் துறை அமைச்சர் 'மின்வெட்டு எல்லா மாநிலத்திலும் இயல்புதான்' என்று வெட்கமில்லாமல் பேசுவதாகவும், துணை சபாநாயகர் 'மின்வெட்டே இல்லை, இதெல்லாம் 'Fake News'' என அப்பட்டமாகப் பொய் பேசுவதாகவும் திமுக குற்றம்சாட்டியுள்ளது. பட்டினப்பாக்கத்தில் மீனவர்கள், ஊதியம் குறித்து செவிலியர்கள், தூய்மைப் பணியாளர்கள் எனப் பல்வேறு தரப்பு மக்களின் போராட்டங்களுக்கு செவிசாய்க்காத அகங்காரம் கொண்ட தவெக அரசு என்றும் விமர்சித்துள்ளது.
தனியார் நிறுவனங்களுக்கு உதவ, அத்தியாவசியமான ஆவின் பாலுக்கும் தட்டுப்பாட்டை உருவாக்கியுள்ளதாகவும், பண்டிகைக் காலங்களில் ஆம்னி பேருந்து மாஃபியாக்கள் மக்களிடம் பல்லாயிரம் ரூபாய் வழிப்பறி செய்யும்போது, அவர்களிடம் 'Party Fund' வாங்கிக்கொண்டு தவெக அரசு வேடிக்கை பார்ப்பதாகவும் திமுக ஐடி விங் தனது பதிவில் குறிப்பிட்டுள்ளது.
'இதைவிட ஒரு கேடுகெட்ட, ஈவிரக்கமற்ற, பொறுப்பற்ற அரசு உலகத்தில் எங்காவது இருக்க முடியுமா? இதுதான் மாற்றமா?' என்று கேள்வி எழுப்பியுள்ள திமுக, தவெக அரசின் செயல்பாடுகளைக் கண்டித்துள்ளது. இந்த விமர்சனங்கள் தமிழ்நாட்டு அரசியல் களத்தில் பெரும் பரபரப்பை ஏற்படுத்தியுள்ளது.
