சென்னை: 2026 ஐபிஎல் தொடர் லீக் சுற்றின் இறுதிக்கட்டத்தை எட்டியுள்ள நிலையில், போட்டிகளின் மீதான ரசிகர்களின் எதிர்பார்ப்பும், விறுவிறுப்பும் பல மடங்கு அதிகரித்துள்ளது. தொடக்க போட்டிகள் சற்று மந்தமாக இருந்தாலும், தற்போது அனைத்து அணிகளும் பிளே ஆப் சுற்றுக்காக கடுமையாக போராடி வருவதால் பார்வையாளர்களின் எண்ணிக்கையும் நாளுக்கு நாள் உயர்ந்து வருகிறது. இந்நிலையில், நடப்பு சீசனில் டிவி மற்றும் டிஜிட்டல் தளங்களில் அதிக ரசிகர்களால் பார்க்கப்பட்ட டாப் 5 அணிகளின் அதிகாரப்பூர்வ பட்டியலை ஸ்டார் ஸ்போர்ட்ஸ் நிறுவனம் வெளியிட்டுள்ளது.
இதில் நடப்பு சாம்பியனான விராட் கோலியின் ராயல் சேலஞ்சர்ஸ் பெங்களூரு அணியை பின்னுக்கு தள்ளிவிட்டு, சென்னை சூப்பர் கிங்ஸ் அணி முதலிடத்தை பிடித்து ஒட்டுமொத்த கிரிக்கெட் உலகையும் ஆச்சரியத்தில் ஆழ்த்தியுள்ளது. இந்த புள்ளிவிபரங்களை விரிவாக பார்ப்போம்.
இதுவரை 43 போட்டிகள் முடிவடைந்துள்ள நிலையில் எடுக்கப்பட்ட தரவுகளின் அடிப்படையில், சென்னை சூப்பர் கிங்ஸ் அணி ஒரு போட்டிக்கு சராசரியாக 308 மில்லியன் பார்வையாளர்களுடன் இந்த பட்டியலில் கம்பீரமாக முதலிடத்தை பிடித்துள்ளது. கடந்த சில ஆண்டுகளாக சிஎஸ்கே அணி ஒரு மாறுதல் கட்டத்தை கடந்து வருகிறது. குறிப்பாக சிஎஸ்கே அணியின் ஜாம்பவான் மகேந்திர சிங் தோனி தற்போது அணியில் இல்லாத நிலையிலும் கூட, சிஎஸ்கே அணிக்கு இருக்கும் மவுசு துளியும் குறையவில்லை என்பதை இந்த புள்ளிவிபரங்கள் அப்பட்டமாக காட்டுகின்றன.
கடந்த 2025ம் ஆண்டு ரஜத் படிதார் தலைமையில் கோப்பையை வென்ற நடப்பு சாம்பியனான ராயல் சேலஞ்சர்ஸ் பெங்களூரு அணி, இந்த பட்டியலில் 2வது இடத்தை பிடித்துள்ளது. விராட் கோலியின் அசுரத்தனமான ரசிகர் பட்டாளத்தால் அந்த அணியின் போட்டிகளை ஒரு போட்டிக்கு சராசரியாக 303 மில்லியன் பேர் பார்த்துள்ளனர். முதல் இரண்டு இடங்களுக்கு இடையே வெறும் 5 மில்லியன் பார்வையாளர்கள் மட்டுமே வித்தியாசம் உள்ளது.
நடப்பு தொடரில் தொடர் தோல்விகளை சந்தித்து மிகவும் பரிதாப நிலையில் தவித்து வந்தாலும், மும்பை இந்தியன்ஸ் அணி தனது தீவிர ரசிகர்களின் பேராதரவால் 293 மில்லியன் பார்வையாளர்களுடன் 3வது இடத்தை பிடித்துள்ளது. இதற்கு அடுத்தபடியாக, அதிரடி மன்னர்களான அபிஷேக் ஷர்மா, டிராவிஸ் ஹெட் மற்றும் ஹென்ரிச் கிளாசென் ஆகியோரின் மிரட்டலான பேட்டிங்கால் அனைவரின் கவனத்தையும் ஈர்த்துள்ள சன்ரைசர்ஸ் ஹைதராபாத் அணி 290 மில்லியன் பார்வையாளர்களுடன் 4வது இடத்தை பிடித்துள்ளது.
தொடரின் முதல் பாதியில் பெரிதாக சோபிக்க தவறிய கொல்கத்தா நைட் ரைடர்ஸ் அணி, 280 மில்லியன் பார்வையாளர்களுடன் 5வது இடத்தை தக்கவைத்துள்ளது. இதன் மூலம் அணியின் வெற்றி தோல்விகளை கடந்து, அணிகள் மீதான ரசிகர்களின் விசுவாசம் எந்த அளவிற்கு வலுவாக உள்ளது என்பது தெளிவாக நிரூபணமாகியுள்ளது.
