தமிழக முதல்வர் ச. ஜோசப் விஜய் குதிரை பேரத்தில் ஈடுபட்டதாகக் கூறி, அவர் மீது ஊழல் வழக்குப்பதிந்து நடவடிக்கை எடுக்க உத்தரவிடக் கோரி தமிழக ஆளுநருக்கு திமுக அமைப்புச் செயலாளர் ஆர்.எஸ்.பாரதி கடிதம் எழுதியுள்ளார். இதுகுறித்து ஆர்.எஸ்.பாரதி எழுதியுள்ள கடிதத்தில், 'கடையநல்லூர் தொகுதி சட்டமன்ற உறுப்பினர் திரு. T.M. ராஜேந்திரன் மற்றும் சீர்காழி தொகுதி சட்டமன்ற உறுப்பினர் திரு. S. செந்தில் செல்வன் ஆகிய இருவரும் 2026 சட்டமன்றத் தேர்தலில் திராவிட முன்னேற்றக் கழக வேட்பாளர்களாக உதயசூரியன் சின்னத்தில் போட்டியிட்டு வெற்றி பெற்றுள்ளனர். இந்நிலையில், ஆளும் தமிழக வெற்றிக் கழக அரசுக்குப் பெரும்பான்மை இல்லாததால், சட்டமன்ற உறுப்பினர்களின் எண்ணிக்கையைக் குறைக்கும் வகையில் அவர்கள் இருவரையும் பதவி விலகச் செய்ய மறுமலர்ச்சி திராவிட முன்னேற்றக் கழகப் பொதுச் செயலாளர் திரு. வைகோ அவர்களுடன் இணைந்து மாண்புமிகு முதலமைச்சர் திரு. ச. ஜோசப் விஜய் அவர்கள் கூட்டுச் சதியில் ஈடுபட்டதை வைகோ அவர்களே வெளிப்படையாகத் தெரிவித்துள்ளார். இத்தகைய குதிரை பேரத்தில் மாண்புமிகு முதலமைச்சர் அவர்களே நேரடியாக ஈடுபட்டுள்ளதால் அவர் மீது வழக்கு பதிந்து நடவடிக்கை எடுக்க ஊழல் தடுப்பு மற்றும் கண்காணிப்புத் துறைக்கு உத்தரவிட வேண்டும்' எனக் குறிப்பிடப்பட்டுள்ளது.
முன்னதாக, முதல்வர் விஜய் குதிரை பேரத்தில் ஈடுபட்டதை வைகோ ஒப்புக்கொண்டு, வெளிப்படையாக தெரிவித்ததை அடிப்படையாகக் கொண்டு இந்த புகார் கடிதம் எழுதப்பட்டுள்ளது. இது தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இந்த குற்றச்சாட்டுக்கள் நிரூபிக்கப்பட்டால், முதல்வர் விஜய் மீது கடும் நடவடிக்கை எடுக்கப்பட வாய்ப்புள்ளது. இதுதொடர்பாக ஆளுநர் மாளிகை தரப்பிலிருந்து இதுவரை எந்தவிதமான அதிகாரப்பூர்வ அறிவிப்பும் வெளியாகவில்லை.
முதல்வர் மீதான இந்த புகார் கடிதம், தமிழக அரசியல் களத்தில் புதிய விவாதங்களை எழுப்பியுள்ளது. இதுகுறித்து அரசியல் கட்சி தலைவர்கள் பலரும் பல்வேறு கருத்துக்களை தெரிவித்து வருகின்றனர். வரும் நாட்களில் இது தொடர்பான மேலும் பல தகவல்கள் வெளியாகலாம் என எதிர்பார்க்கப்படுகிறது.
